Qaýly qaıta ózgerdi: Aqtóbede oqýshylar onlaın bilim alady
AQTÓBE. QazAqparat – Aqtóbe oblystyq sanıtarııalyq-epıdemıologııalyq baqylaý departamenti qaýlyny qaıta ózgertti. Endi oqýshylardyń basym bóligi onlaın formatta bilim alady, dep habarlaıdy QazAqparat tilshisi.
Búgin túske deıin Aqtóbe oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva «300 oqýshysy bar mektepter dástúrli formatqa kóshedi, al oqýshy sany odan kóp bolsa, aralas format tańdaldy» dep habarlaǵan edi. Keshkisin qaýly qaıta ózgerdi.
«Oqýshy sany 300-den aspaıtyn mektepte oqý dástúrli túrde júrgiziledi. Mundaı 246 mektep bar. Bul shalǵaıdaǵy aýyl mektepteri. Al oqýshy sany 300-den asatyn 170-ten astam mektepte oqý onlaın ótedi. Tek 9 jáne 11 synyp oqýshylary mektepke barady. Olar pánderdiń 70 paıyzyn mektepte oqysa, ózgesi onlaın uıymdastyrylady», - dedi oblystyq bilim basqarmasynyń basshysy Joldas Batyrhan.
Erekshe bilim berýge arnalǵan ınternat, daryndy balalarǵa arnalǵan mektep-ınternatta dástúrli format saqtalady.
