Káýken Kenjetaev týraly derekti fılmniń tusaýy kesildi
ALMATY. QazAqparat - Almatyda Qazaq KSR-niń halyq ártisi Káýken Kenjetaevtiń ómiri men shyǵarmashylyǵyna arnalǵan «Káýken juldyzy» atty derekti fılmniń tusaýy kesildi, dep habarlaıdy QazAqparat tilshisi.
QazAqparat tilshisimen tildesken fılm rejısseri Ǵazız Nasyrov kartına jóninde aıtyp berdi.
«1960 jyldar - qazaq óneri gúldengen ýaqyt. Sháken Aımanovtyń shyǵarmashylyǵy men áýleti meni árqashan qyzyqtyryp turatyn. Oılana kele, ol kisiniń inisi Káýken Kenjetaev týraly fılm túsirýge bel býdyq. Kartına Baıanaýylda, ol kisiniń týyp ósken jerinde túsirildi, oǵan bir jyldaı ýaqyt ketti. Meniń oıymsha, osyndaı tulǵalardan úlgi alyp, olardy maqtan tutýymyz kerek. Ózim osy fılmdi qolyma alǵanyma qatty qýanamyn. Ózim de kóp syrǵa qanyqtym. Arýaqty jer Baıanaýylǵa bardym. Ol jaqta Buqar jyraýdan bastap, Máshhúr Júsipke deıin barlyǵyn tanı túsesiń. Jan saraıyńdy jaryq qylady. Káýken aǵa da sol jyr, ánderdi tyńdap, armandap ósken. Men sony kórsetkim keldi. Ol kisiniń alyp tulǵaǵa aınalýynda sol eldiń tarıhy men jyrlary ólsheýsiz úles qosqan, boıyna sińgen. Sony kórsettik», - dedi derekti fılm rejısseri Ǵazız Nasyrov.
Týyndy QR Ulttyq kitaphanasyndaǵy rejısser Ermek Tursynovtyń kıno klýbynda tusaýy kesildi. Tanymal rejısser kórermen retinde derekti fılmge óz baǵasyn berdi.
«Mundaı fılm jas urpaq úshin óte kerek. Kıno óte sátti shyqqan. Uzaqtyǵy bir saǵattan asady. Baıanaýylǵa, Máskeýge, Pavlodardyń muraǵatynda bir jyldaı jumys jasady. Árıne, Káýken atamyz ánshi bolǵandyqtan ánshiliginen bastalyp, qandaı akter boldy, ómirde qandaı boldy sony kórsetýge tyrysqan. Sapaly shyqqan, kóptegen kóz kórgender qatysyp, estelikterin aıtqan. Osyndaı fılmderdi kóbirek túsirý qajet», - dedi Ermek Tursynov.
