«Qaýqary az qaptaǵan uıymdy qarjylandyrý durys pa?» - baspasózge sholý
***
«Egemen Qazaqstan» gazeti Reseı Federatsııasy Úkimeti Tóraǵasynyń birinshi orynbasary I.I.Shývalovpen aradaǵy suhbatty jarııalap otyr. «Qazir, 2014 jyly, Eýrazııalyq ekonomıkalyq odaq qurý týraly shartqa qol qoıýǵa taqaý kelip turǵan ýaqytta biz shyn máninde Qazaqstan Respýblıkasynyń Prezıdenti Nursultan Nazarbaevtyń bolashaqty ǵylymı turǵydan boljaý darynyna jáne tereń saıası danalyǵyna tań qalamyz. Burynǵy keńestik respýblıkalardyń órkenıetti túrde aıyrylysýynan týǵan masaıraý kóńil-kúıi bizdiń burynǵy birge ótken ómirimizdiń artyqshylyqtaryn da, sonymen qatar, naryqtyq ekonomıkanyń artyqshylyqtaryn júzege asyrý barysynda jańadan qol jetken daǵdylardy da paıdalanýdyń negizinde ıntegratsııaǵa umtylýmen almasýy múmkin ekenin jáne solaı bolýǵa tıis ekenin ol basqalardan burynyraq túsine bildi. Keden odaǵyn, Birtutas ekonomıkalyq keńistikti, al qazir Eýrazııalyq ekonomıkalyq odaq qurý jónindegi búkil jumystyń barysynda biz N.Á.Nazarbaevtyń qyzý múddeliligi men naqty qoldaýyn udaıy sezinip otyrǵanymyzdy qadap aıtqym keledi. Kóptegen kúrdeli ekonomıkalyq túıinder kelissózderge naq onyń tikeleı qatysýynyń arqasynda tarqatyldy. N.Á.Nazarbaevtyń tikeleı qatysýynsyz bul jobanyń júzege asýy neǵaıbil edi desem, munym artyq aıtqandyq bolmaıdy», - dedi ol. Bul suhbat «Igor ShÝVALOV: Biz Nursultan Nazarbaevtyń saıası danalyǵyna tań qalamyz» degen taqyryppen basyldy.
Osy basylymda «Oza shaýyp báıge aldy» atty materıal berilgen. Belarýs astanasy Mınsk qalasynda L.N.Gýmılev atyndaǵy Eýrazııa ulttyq ýnıversıteti TMD syılyǵymen marapattaldy. Táýelsiz Memleketter Dostastyǵy elderiniń ekonomıkalyq keńesi 2013 jylǵy qyzmet kórsetý jáne ónim sapasy jónindegi baıqaýdyń jeńimpazdaryn jarııa etti. L.N.Gýmılev atyndaǵy Eýrazııa ulttyq ýnıversıteti «Qyzmet kórsetý» atalymy boıynsha ǵylymı tabystary úshin Táýelsiz Memleketter Dostastyǵy syılyǵynyń ıegeri atandy. Keshe Mınskide TMD Atqarýshy komıtetiniń atqarýshy hatshysy Sergeı Lebedev Eýrazııa ulttyq ýnıversıtetiniń rektory Erlan Sydyqovqa arnaıy dıplom men syılyqty tabys etti. Jeńimpazdardy Ázerbaıjan, Armenııa, Belarýs, Qazaqstan, Qyrǵyzstan, Moldova, Reseı, Tájikstan, Túrikmenstan sekildi TMD-ǵa múshe 11 memlekettiń úkimet jetekshileri anyqtady.
***
«Aıqyn» gazetiniń jazýynsha, Májiliste «Memlekettik jastar saıasaty týraly» zańynyń jobasy jumys tobynda talqylandy. Jıynda ártúrli memlekettik mekemeler men qoǵamdyq uıymdar patrıottyq tárbıeleý isi jaıynda baıandama jasady. - Osy zań jobasynda depýtattar jastardy patrıottyq tárbıeleý ortalyǵyn qurýdy usynýda, - dedi Qorǵanys mınıstrligi QK BSh Tárbıe jáne ıdeologııalyq jumystar departamenti bastyǵynyń orynbasary Qaısar Muǵalov. - Biz, Qorǵanys mınıstrliginiń basshylyǵymen aqyldasa kele, bul usynysty qoldaýǵa sheshtik, biraq ol ortalyqtardyń áskerı bólimder janyndaǵy «áskerı-patrıottyq tárbıeleý ortalyqtary» bolǵanyn qalaımyz. Bul bizdiń múmkindikterge jaýap berer edi. Áskerı-patrıottyq tárbıeleý ortalyqtaryn bárinen bólek, dál áskerı bólimderdiń qasynan qurý durys! - degen ol ózderiniń osy ustanymda tabandaıtyndaryn tanytty. Osy másele arqaý bolǵan maqala basylymnyń búgingi sanynda «Qaýqary az qaptaǵan uıymdy qarjylandyrý durys pa?» degen taqyryppen jarııalandy.
Osy gazette «Tasmaǵambetov kásipkerliktiń tynysyn ashpaq» atty maqala kópshilik nazaryna usynylyp otyr. Astanada kóleńkeli ekonomıkadaǵy qarjy aınalymy 20 paıyzdy quraıdy. Bul shamamen 500 mlrd. teńgeden asady. Endi úshinshi ret jarııalanǵan kapıtaldy zańdastyrý týraly aktsııaǵa saı iri kásipkerler men kapıtal ıeleri óz múlikterin jasyrmaı, ashyq túrde aınalymǵa shyǵarsa eshqandaı jaýapkershilikke tartylmaıdy. Elorda ákimi Imanǵalı Tasmaǵambetov keshe Ulttyq kásipkerler palatasynyń sezi qarsańynda ótken Astana kásipkerleriniń konferentsııasynda bıznesmenderdi ashyq dıalogqa shaqyrdy. Qazirgi kezde kez kelgen qalada kásipkerlikke barynsha kóńil bólinip jatyr. Óıtkeni shahardy damytýda, jańa jumys oryndaryn qurýda, qazyna salyǵyn eseleýde bıznesmenderdiń eńbegi erekshe - dedi, I.Tasmaǵambetov. - Bizdiń Astana keshege deıin dotatsııaly ortalyqtyń biri bolyp kelgen edi. Investıtsııanyń artýy men kásipkerliktiń kúrt kóterilýiniń nátıjesinde bıyldan bastap qaıta kerisinshe respýblıkalyq bıýdjetke qarjy quıatyn tórtinshi donorlyq qalaǵa aınaldy.
***
«Ekspress-K» basylymynyń búgingi sanynda « Shıroko zakrytye glaza» atty maqala berildi. Kózi kórmeıtin jáne aıaǵyn basýǵa qaýqarsyz aqtóbelik múgedek qatygezderdiń aldaýyna urynyp otyr. Onyń osyndaı jaǵdaıyn paıdalanyp, alaıaqtar múgedektiń jer ýchaskelerin eki márte qaıta satyp jibergen. Qalaý Baqtygereev esimdi múmkindigi shekteýli bul azamat tórt jyldan beri óziniń jer telimderin qaıtara almaı keledi.
