Qaýipti júrgizýshi: Túrkistan oblysynda 3 myńǵa tarta kólik aıypturaqqa qoıyldy

TÚRKІSTAN. QazAqparat – Túrkistan oblysynda «Qorǵaý: qaýipti júrgizýshi» baǵdarlamasy iske qosylǵan bolatyn. Búginde joba nátıjesin berip jatyr, dep habarlaıdy QazAqparat oblystyq PD baspasóz qyzmetine silteme jasap.

Joba maqsaty – jol-kólik oqıǵalarynyń aldyn alý, adam ólimimen aıaqtalatyn oqys jaıttardy boldyrmaý, jalpy jol qozǵalysy erejesin buzýshylardy der kezinde anyqtaý.

Túrkistan oblysy Polıtsııa departamentiniń polıtseıleri baǵdarlama kómegimen QR ÁQBtK 612-babynyń 2 jáne 3-bóligi «Qujatsyz jáne basqarý quqyǵy joq adamnyń kólik quralyn basqarýy» boıynsha 341 kólik júrgizýshisin anyqtady. Al, QR ÁQBtK-niń 590-baby 4-bóligi «Kólik quraldaryn paıdalaný erejelerin buzý» boıynsha 28 jol erejesin buzý deregin tirkedi. Aıypturaqqa 2 954 avtokólik qoıyldy. Máselen tártip saqshylary «Qorǵaý» baǵdarlamasymen 13 mıllıon teńge bereshegi bar Túrkistan qalasy turǵynynyń avtokóligin ustady. Jedel qyzmet etken polıtseıler respýblıkalyq mańyzy bar trassalardyń birinen bereshegi bar «Toıota» markaly avtokólikti anyqtady.

Aıta ketsek, bul baǵdarlamada «Sergek» kameralary, Jedel basqarý ortalyǵy men polıtsııa qyzmetkerleriniń planshetterindegi mobıldi qosymsha biriktirilgen. Osy arqyly tártip saqshysynyń planshetine dabyl túsip, der kezinde quqyq buzýshylyqtardyń jolyn kesýge múmkindik beredi.

Sonymen qatar, polıtsııa qyzmetkerleri atalmysh mobıldi qosymsha kómegimen tekserýden ótpegen, aıyppuly tólenbegen jaqyn mańdaǵy kólikterdi jáne jol qozǵalysy erejesin buzýdyń basqa da jaıttaryn anyqtaı alady. Polıtseıler jol qozǵalysy kezinde erejeni eskermeıtin júrgizýshiler zor qaýip tóndiretinin eskertedi.