Qaýipti jumysy úshin tabıǵatty qorǵaý ınspektorlaryna qosymsha aqy tólenbek

ASTANA. QazAqparat – Ómirine jáne densaýlyǵyna qaýip tóndiretin jumystardy atqaratyn tabıǵatty qorǵaý ınspektorlaryna qosymsha aqy tólenýi múmkin.

Bul týraly «Ashyq» NQA portalynda jarııalanǵan Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti tóraǵasynyń buıyryǵynda jazylǵan, dep habarlaıdy QazAqparat tilshisi.

«QR Memlekettik orman kúzeti qyzmetteriniń, tabıǵat qorǵaý mekemeleriniń memlekettik ınspektorlarynyń jáne janýarlar dúnıesin qorǵaý, ormandardy qorǵaý, ósimin molaıtý jáne orman paıdalaný jónindegi mamandandyrylǵan uıymdardyń ınspektorlarynyń, balyq sharýashylyǵy sý aıdyndary nemese ýchaskelerin balyqtandyrý boıynsha ósimin molaıtý kesheniniń memlekettik kásiporyndarynyń qyzmetkerlerine densaýlyqqa jáne ómirge zııan keltirý qaýpimen baılanysty jumys úshin laýazymdyq aqydan 100% mólsherde qosymsha aqy tólensin», - delingen buıyryq jobasynda.

Qujat 25 mamyrǵa deıin kópshilik talqylaýda bolady.