Qaýipti jumystardy atqaratyn orman kúzeti qyzmetkerlerine qosymsha aqy tólenbek

ASTANA. QazAqparat – Qaýipti jumystardy oryndaıtyn Memlekettik orman kúzeti qyzmetkerlerine qosymsha aqy tólenýi múmkin. Bul týraly «Ashyq» NQA portalynda jarııalanǵan Úkimet qaýlysynda kórsetilgen, dep habarlaıdy QazAqparat tilshisi.

«QR Memlekettik orman kúzeti qyzmetteriniń, tabıǵat qorǵaý mekemeleriniń memlekettik ınspektorlarynyń jáne janýarlar dúnıesin, ormandardy qorǵaý, ósimin molaıtý jáne orman paıdalaný jónindegi mamandandyrylǵan uıymdardyń qyzmetkerlerine densaýlyqqa jáne ómirge zııan keltirý qaýpimen baılanysty jumysy úshin laýazymdy aılyqtyń 100% mólsherinde qosymsha aqy tólenedi», - delingen qaýlyda.

Qujatqa qosymsha berilgen túsindermege saı, mundaı bastama materıaldyq turǵydan álsiz qamtamasyz etilgen sala mamandarynyń máselesin sheshýge baǵyttalǵany jazylǵan.

«Azamattyq qyzmetshilerge, memlekettik bıýdjet qarajaty esebinen ustalatyn uıymdar qyzmetkerlerine, qazynalyq kásiporyndar qyzmetkerlerine eńbekaqy tóleý júıesi týraly» QR Úkimetiniń qaýlysymen qyzmetkerlerdiń kórsetilgen sanattary úshin 2025 jylǵa deıingi laýazymdyq aılyqaqylardyń belgilengen mólsherine eki ese ulǵaıý mólsherinde túzetý koeffıtsıentteri belgilengen. Óz kezeginde, Qostanaı, Shyǵys Qazaqstan, Almaty jáne Qaraǵandy oblystaryndaǵy sońǵy aýqymdy orman órtteri orman sharýashylyǵy mamandarynyń, ásirese aýyldyq jerlerde tapshylyǵy, sondaı-aq qyzmetterdi materıaldyq qamtamasyz etýdiń álsizdigi problemalaryn ashty. Osyǵan baılanysty, QR Premer-Mınıstri Álıhan Smaıylovtyń 2022 jylǵy 8 qyrkúıektegi tapsyrmasyn iske asyrý sheńberinde tabıǵat qorǵaý mekemeleriniń qyzmetkerlerine jalaqyny ulǵaıtý usynylady», - dep túsindirme berilgen qujatqa.

Qaýly 30 naýryzǵa deıin kópshilik talqylaýda bolady.