Qaýipti taýarlardy elge kirgizgen stansa basshysy paramen ustaldy
Agenttiktiń resmı ókili Janna Bastarovanyń aıtýynsha, Sybaılas jemqorlyqqa qarsy is-qımyl ulttyq bıýrosynyń Almaty oblystyq departamenti jedel-izdestirý sharalary barysynda «Qazaqstan temir joly» ulttyq kompanııasy» AQ «Altynkól» temirjol stansasy bastyǵynyń paraqorlyq faktisin anyqtady.
«Ol halyq tutynatyn taýarlar tıelgen vagondardy kedergisiz kirgizý úshin syrtqy ekonomıkalyq qyzmet qatysýshylarynan 17,8 myń AQSh dollary kóleminde júıeli túrde para alǵany úshin kúdikke ilinip otyr. Atalǵan taýarlardyń radıatsııalyq kórsetkishi normadan joǵary bolǵan. Aǵymdaǵy jyly 20 aqpanda kúdikti ustalyp, Taldyqorǵan qalasy polıtsııa basqarmasynyń ýaqytsha ustaý abaqtysyna toǵytyldy. Tergeý jalǵasýda», - dedi J.Bastarova Astanada ótken baspasóz máslıxatynda.
Aıta keteıik, búgingi brıfıngte agenttik ókilderi birneshe vıdeony jarııalady. Máselen, Almaty oblysy Uıǵyr aýdany ákiminiń orynbasary óz kabınetinde paramen ustaldy. Al Aqtóbe qalasynda úsh polıtseı bir azamattyń ulyn qylmystyq jaýapkershilikke tartpaǵany úshin 300 myń teńge somasynda para alǵan. Olar zańsyz aqsha alý ústinde qolǵa tústi.