Qaýipti sanalatyn Sergeev sý qoımasy bıyl 79 paıyzǵa tolǵan - SQO

PETROPAVL. QazAqparat – Soltústik Qazaqstan oblysyna bıyl kóktem erte kelgen jaǵdaıda sý tasqyny bolmaýy múmkin, dep habarlaıdy QazAqparat tilshisi.

Kóktemgi sý tasqyny boıynsha ótken oblystyq ákimdiktiń otyrysynda mamandar gıdrometeorologııalyq jaǵdaıǵa toqtaldy.

«Qazgıdromettiń» málimeti boıynsha, óńirde kúzde jer qyrtysy jyldaǵy kórsetkishten 39 %-ǵa kem ylǵal jıǵan.

Esil ózeni basseınindegi sý qory mólsheri qazir 3934 mln tekshe metr, bul – kópjylǵy shamaǵa saı.

Jer qyrtysy qysta 66-151 sm-ge deıin qatty. Bul da jyldaǵy kórsetkishke jaqyn.

«Sergeev sý qoımasy qazirgi ýaqytta 79,2 %-ǵa tolǵan. Byltyrǵy kórsetkishten 10 %-ǵa tómen. Qazir sý qoımasynda 549 mln tekshe metr sý bar, jalpy jobalyq syıymdylyǵy - 693 mln tekshe metr. Qar erigen ýaqytta Esil ózeni arqyly Sergeev sý qoımasy 1080 mln tekshe metrge deıin tolady dep boljap otyrmyz. Al Sileti sý qoımasynda 138 mln tekshe metr sý bolady. Bul – jyldaǵy kórsetkishke saı», - deıdi SQO tótenshe jaǵdaılar departamentiniń bastyǵy Ramıl Kamalov.

Osynyń bárin esepke alǵan mamandar, kóktem erte kelgen jaǵdaıda SQO aýmaǵynda sý tasqyny bolmaıdy degen pikirde.

Desek te, kelesi aptadan bastap jaýapty vedomstvolar kóktemgi sý tasqynyna joǵary daıyndyq rejımine kóshpek.