Qaýipti ónimder qatarynda sheteldik taýarlar kóp - Jandarbek Bekshın
Bul týraly Qazaqstannyń bas sanıtar dárigeri, Qoǵamdyq densaýlyq saqtaý komıtetiniń tóraǵasy Jandarbek Bekshın Astanada ótken baspasóz máslıhatynda aıtty.
«2018 jyly respýblıka boıynsha sanıtarlyq-epıdemıologııalyq tekserýge jatatyn 69 myńnan astam azyq-túlik jáne taýar synamalary tekserildi. Onyń 9740-y tańbalaýyna, jazylǵan sıpattamalaryna jáne qaýipsizdik talaptaryna saı kelgen joq. Barlyq quqyqbuzýshylyqtar boıynsha kásipkerlik sýbektilerine qatysty kemshilikterdi retteý týraly 2232 nusqaýlyq berildi», - dedi Jandarbek Bekshın.
Onyń aıtýynsha, erejege saı kelmegen ónimderdiń 66,1% - syrttan kelgen ımporttyq ónimder, al otandyq ónimderdiń mundaǵy úlesi - 33,9%.
«Elimizde tehnıkalyq talaptarǵa saı kelmeıtin ónimderdiń basym bóligi Reseı Federatsııasynda (52%), Qazaqstanda (23%), Qyrǵyzstanda (4%), Belarýs (3%), Ýkraına (2,5%), Qytaı, Túrkııa jáne ózge de (Latvııa, AQSh, Moldova, Grýzııa, Frantsııa, Ózbekstan - 1%) elderde óndirilgeni anyqtaldy. Pákistanda shyǵarylǵan 6 túrli shaıdyń elge jetkizilýine tyıym salyndy. Sebebi, olardyń quramynan tyıym salynǵan sıntetıkalyq boıaýlar tabyldy», - dedi bas sanıtar.
Jospardan tys tekserý nátıjesinde talaptarǵa saı kelmeıtin ónimderdi anyqtaý faktisimen 703 ákimshilik is qozǵalyp, 62 mln teńgeden astam aıyppul salyndy.
«Jalpy quny 24,5 mln teńge bolatyn 22,5 tonna qaýipti ónim satylymnan alyndy. Onyń ishinde 5 tonna maı-tońmaı ónimderi, 2,96 tonna qus eti, 3 tonna sút ónimderi, 845 keli un ónimderi, 229 keli shujyq jáne 712 keli balyq ónimderi joıyldy. Sondaı-aq, 2018 jyly respýblıka boıynsha 2241 oıynshyq synamasyna zertteý júrgizildi. Onyń 1183-i nemese 52,7% tehnıkalyq talaptarǵa saı kelmedi. 234,5 keli oıynshyq naryqtan alynyp tastaldy», - dedi Jandarbek Bekshın.