Qaýipti dert qaıta órshidi: Óskemen turǵyndary karantındik shekteýlerge qalaı qaraıdy

ÓSKEMEN. QazAqparat – Qazir Qazaqstanda koronavırýs qaıta órship tur. Soǵan oraı shekteý sharalary kúsheıtile tústi. Juqpaly dert Óskemen jurtshylyǵyn da ábigerge salýda. Halyq arasynda karantın talaptaryn saqtaý qajettigi jaıly túsindirý jumystary keńinen júrgizilýde. Maska taqpaǵandar saýda úılerine, dúkenderge kire almaıdy. «Ashyq» jobasyna qatysatyn obektilerge demalys kúnderi tek «jasyl» statýsy bar adamdar ǵana kele alady. Al buǵan turǵyndar qalaı qaraıdy? Mine, osyny bilý úshin kóshede kele jatqan óskemendiktermen sóılesip kórdik.

Aldymyzdan jolyǵyp, saýaldarymyzǵa jaýap bergen alǵashqy adam – Nurııa Blıznıýk boldy.

«Bul indetke basynda kúmánmen qaraǵanym ras. Biraq ózimiz aýyryp qalǵanda senbeske amalym qamaldy. Vırýsty óte aýyr ótkerdim. Ókpemniń 75 paıyzy qabyndy. Aýrýhanada 21 kún jatyp, emdeldim. Dárigerler jaqsy qarady. Solardyń arqasynda jazylyp shyǵyp, otbasyma oraldym. Sondyqtan osyndaı karantındik shekteýlerdi tolyqtaı qoldaımyn. Biraq avtobýstarda maska taqpaıtyndar kóp. Bul – durys emes. Ózimizdiń densaýlyǵymyz úshin saqtanyp júreıik! Saqtanǵandy Qudaı saqtaıdy», - dedi ol.

Zamıra Súleımenovanyń aıtýynsha, shekteý sharalaryn qatań saqtaýdyń arqasynda ǵana qalypty ómirge tez oralamyz.

«Koronavırýstyń óte jyldam taraıtynyn bárimiz kórip otyrmyz. Onyń mýtatsııalanǵan jańa shtamdary da shyǵyp jatyr. Qazir búkil álem halqyn ábigerge salyp otyrǵan – «omıkron» shtamy. Vırýsty jeńýdiń joly – qatań tártip», - dedi stýdent.

Zeınetker Amanjol Jaqaev óz sózinde qoǵamdyq oryndarda únemi maska taǵyp júretinin jetkizdi.

«Teledıdardan jańalyqtardy únemi kórip otyramyz. Ondaǵy aıtylyp jatqannyń bári shyndyq. Sol úshin karantın talaptaryn bir kisideı saqtaǵanymyz jón. Bári halyqtyń ózine baılanysty. Vaktsına alǵan áste durys. Ózim qytaılyq Vero Sell ekpesiniń eki komponentin saldyrdym. Eshqandaı janama áserler bolǵan joq. Vaktsına alsam da únemi maska taǵyp, áleýmettik araqashyqtyqty saqtap júremin», - dedi Óskemen turǵyny.

Mıra Mamyrhanova bir emes eki maska taǵyp júretinin jetkizdi.

«№44 mektepte orys tili páninen sabaq beremin. Bilim ordasynda karantındik shekteýler qatań saqtalady. Ózim avtobýsta, kóshede únemi eki maska taǵyp júremin. Halyqqa aıtarym, shekteýlerdi buzbaı, bir jerge kirip-shyqqanda antıseptıkpen qoldaryńyzdy súrtip, ımmýnıtetti kúsheıtý úshin dárýmender ishińizder. Durys tamaqtanyp, aýrýdyń sımptomdary baıqalsa jumysqa barmaı, dárigerge qaralyńyzdar», - dedi pedagog.

«Ózim, áıelim men eki balam túgel aýyryp shyqtyq. Bul vırýs adamdy qatty álsiretip, kúsh-qýattan aıyrady eken. Sondyqtan árkez saqtanyp júrgen durys. Juqpaly dertten qorǵan bolatyn ol – vaktsına. Ózim reseılik «Spýtnık V» ekpesin saldyrdym», - dedi Danııar Nurbaev.

Onyń aıtýynsha, qazir koronavırýs juqtyryp jatqan tanystary óte kóp. Vırýstyń qaıta órshýine baılanysty karantındik shekteýlerdiń engizilýi quba-qup.

«Pandemııa bastalǵaly beri baýyrdyń amandyǵyn, densaýlyqtyń qadirin endi túsinip jatqandaımyz. Qala turǵyny retinde engizilip jatqan shekteý sharalaryna shaǵymdanbaı, barynsha saqtanyp, derttiń dendeýine jol bermeıikshi degim keledi. Aýrýhanadaǵy naýqastar tezirek saýyǵyp shyqsyn dep tileımin», - dedi Aqtolqyn Jansapova.