Qaýipsizdikti umytqan oıyn-saýyq ortalyqtaryna qandaı shara qoldanylady
ASTANA. QazAqparat - Esikterin jaýyp qoıatyn saýda, oıyn-saýyq ortalyqtaryna 50 aılyq eseptik kórsetkish kóleminde ákimshilik aıyppul salynady. Bul týraly búgin Úkimet otyrysynan keıin BAQ ókilderiniń saýalyna jaýap bergen QR ІІM Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat.
«Bizde barlyǵy 1151 iri saýda ortalyǵy bar. Olardyń barlyǵyn da 2018 jyly tekserý josparlanǵan. Tekserýden demalys degen bizde joq. Ol eki jartyjyldyqqa bólingen. Barlyǵy da tekseriletin bolady. Mundaı qaıǵyly oqıǵany (Reseıdiń Kemerovo qalasyndaǵy birneshe adamnyń ómirin jalmaǵan saýda úıindegi órt) eskere otyryp, keshe aýmaqtyq organdarǵa arnalǵan nusqaýlyqqa qol qoıyldy. Onda órtti anyqtaý júıesiniń jaı-kúıine, qaýipsizdikti keshendi qamtamasyz etý máselesine basa nazar aýdarý kózdelgen», - dedi ol.
Sonymen qatar ol qaýipsizdik sharalaryn durys saqtamaǵan saýda ortalyqtaryna qandaı jaza qoldanylýy múmkin ekendigin de aıtyp berdi.
«50 aılyq eseptik kórsetkish kóleminde, ákimshilik aıyppul salynady. Bul 120250 teńgeni quraıdy. Árbir esikke aıyppul salmaımyz, ákimshilik hattama toltyramyz. Buzýshylyq anyqtalǵanda ákimshilik jaýapkershilikke tartylady. Uıǵarym beriledi. Eger qaıta tekserilgen kezde buzýshylyq joıylmasa, onda materıal sotqa berilip, 100 AEK nemese nysan qyzmetin toqtatý týraly shara qarastyrylady. Mundaı sharany biz ótken jyly 21 ret qoldandyq», - dedi Bekker.
