Qaýipsizdikti qamtamasyz etý jáne lokomotıvterdi jóndeý jumystarynyń sapasy jóninde jınalys ótti
ASTANA. Jeltoqsannyń 15-i. QazAqparat. Bıylǵy jeltoqsannyń 11-de Qazaqstan Respýblıkasy Kólik jáne kommýnıkatsııa mınıstrliginde vıtse-mınıstr A. Bekturovtyń basshylyǵymen qaýipsizdikti qamtamasyz etý jáne lokomotıvterdi jóndeý jumystarynyń sapasy jóninde jınalys ótkizildi,
dep habarlaıdy KKM baspasóz qyzmeti.
Jınalysta «Qazaqstan temir joly» Ulttyq kompanııasynyń birinshi basshylary: «Lokomotıv» AQ prezıdenti K. Talasbekov, «QamqorMenedjment» JShS bas dırektorynyń orynbasary M. Ámirov, qaýipsizdik departamentiniń ókili Z. Sharıkov qatysty.
Jınalys barysynda temirjol kóligindegi qaýipsizdikti qamtamasyz etý, lokomotıvtedi jóndeý jumystarynyń sapasy jónindegi máseleler talqylandy.
Temirjol qozǵalysynyń jáne tasymaldaý protsesiniń qaýipsizdigine áser etetin negizgi faktorlardyń biri óndiristiń tehnıkalyq jabdyqtalýy men jóndeý jumystarynyń sapasy bolyp tabylady.
Kóliktik baqylaý organdary ótkizgen tekserýlerdiń qorytyndysy boıynsha aǵymdaǵy jyldyń 10 aıynda tartqysh jyljymaly quramdy kútip-ustaý jáne paıdalaný boıynsha 244 lokomotıv toqtatyldy, lokomotıv sharýashylyǵynda qozǵalys qaýipsizdigi boıynsha 117 buzýshylyq anyqtaldy, onyń ishinde 8 erekshe eseptegi jaǵdaı, 37 jaǵdaı jumystaǵy aqaýlyqqa baılanysty, 61 jaǵdaı jumystaǵy qıynshylyqqa baılanysty, 11-i - ózge jaǵdaılar.
Jasalǵan buzýshylyqtar boıynsha júrgizilgen taldaý jóndeý mekemelerindegi jóndeý jumystarynyń tómen sapasyn, jóndeýden ótken lokomotıv jáne olardyń túıinderi men agregattary sapasynyń nasharlaý úrdisine qaraı turaqty tómendeýin kórsetip otyr.
Sonymen birge tehnıkalyq qyzmet kórsetý jáne jóndeý jumystarynyń ýaqytyly júrgizilmeý sebebi jóndeý mekemelerinde tıisti daıyndyqtyń (qosalqy bólshekterdiń, túıinderdiń) joqtyǵy bolyp tabylady.
Anyqtama:
Lokomotıvti jóndeý sapasy boıynsha buzýshylyq «MAK Ekıbastýz» JShS-men («Parıtet PTF JShS) jiberildi. Aǵymdaǵy jyldyń 12 maýsymynda Anar-Vıshnevka aralyǵynda «Qaraǵandy-Astana» baǵytymen kele jatqan № 855 elektrpoıyzy dońǵalaq juptardyń dońǵalaq-motorly bloktarynyń aqaýlyǵyna baılanysty toqtatyldy.
2009 jylǵy 13 tamyzynda 6-razezde «Almaty-Mańǵystaý» qatynasy boıynsha kele jatqan № 378 jolaýshylar poıyzy dońǵalaq jubyndaǵy býksalardyń qyzýyna baılanysty toqtatyldy. Bul jaǵdaıda TO-6 kólemindegi tehnıkalyq qyzmet kórsetýdi «Ǵasyr Mańǵystaý» JShS júzege asyrǵan (podshıpnık qursaýynyń synýy TO-6 tsıkli boıynsha tehnıkalyq qyzmet kórsetý kezinde anyqtalmaǵan kishi jaryqshaqtardyń sebebinen bolǵan).
Almaty jol bólimshesiniń «Aqbalyq» stansysynda aǵymdaǵy jyly lokomotıv brıgadasynyń kinásinen aıqaspaly burmada tyıym salý sıgnalyna júrip ótý buzýshylyǵy anyqtaldy. Nátıjesinde teplovoz joldan shyǵyp ketti.
Aǵymdaǵy jyldyń 12 maýsymynda Pavlodar jol bólimshesi Ekibastuz stansysynda jyljymaly quramnyń 14-joldan shyǵyp, 12-jolǵa kelgen manevrlik qurammen soqtyǵysý oqıǵasy oryn aldy.
