Qaýipsizdik talaptaryn saqtap, tártipke baǵynsaq, indetti jeńemiz – Ramazan Stamǵazıev
ALMATY. QazAqparat – Dástúrli ánshi, Qazaqstannyń eńbek sińirgen ártisi Ramazan Stamǵazıev halyqty qaýipsizdik sharalaryn saqtap, tártipke baǵynýǵa shaqyrdy, dep habarlaıdy QazAqparat tilshisi.
«Qurmet» ordeniniń ıegeri Ramazan Stamǵazıevtiń aıtýynsha, dert dendep barady, sondyqtan qazir barlyq sharýany ysyryp qoıyp, densaýlyqqa den qoıý kerek.
«Qazir koronavırýs indeti órshı tústi. Ony kúndelikti aqparat quraldary jazyp ta, aıtyp ta jatyr. Ókinishke qaraı, sońǵy on kúnde qaıtys bolǵandardyń sany artty. Kóz kórgen, eline tanymal adamdar ómirden ozyp jatyr. Buryn senbegen halyqtyń oı-pikiri tutastaı ózgerdi. Sondyqtan qazir saqtyq kerek, óz basyńdy ǵana emes, aınalańdaǵy tanystaryńdy, týystaryńdy, balalaryńdy, nemerelerińdi osy dertten qorǵaıtyn kez jetti. Qazir balalar jazǵy demalysqa shyqty, osyny paıdalynyp, adamdardy taǵy da bir júıege keltirý kerek shyǵar»,– deıdi Ramazan Stamǵazıev.
Sonymen qatar, ol óziniń de aýyrǵanyn aıtty.
«Qazir qorqatyn jaǵdaıǵa jettik. Óıtkeni, koronavırýspen aýyrǵan adamdarmen baılanysta bolǵandardyń aıaǵynan tik turyp júrgenderi kemde-kem. Bárimiz tumaýdyń orta jáne jeńil túrimen aýyryp turdyq. Basymyz aýyryp, súıegimiz qaqsap, kózimiz tartyp, júregimiz aınydy. Myna dárihanalardyń aldyndaǵy kezekti kórgen kezde adam shynymen de qorqady eken»,– deıdi ánshi.
Ramazan Stamǵazıev halyqty qaýipsizdik sharalaryn saqtaýǵa shaqyrdy.
«Kúni keshe ǵana memlekettik komıssııa usynǵan karantındi saqtaýǵa tıispiz. Barlyqtaryńyz úıde otyryńyzdar, jaqyndaryńyzdy qorǵańyzdar, tártipke baǵynaıyq. Baýyrjan Momyshulynyń aıtqany bar - «Tártipke baǵynǵan el qul bolmaıdy». Bul kún de kórgen tústeı artta qalar, aman bolaıyq»,– dep qorytyndylady Ramazan Stamǵazıev.
