Qaýipsizdik talaptaryn óreskel buzǵan 582 ónerkásiptiń jumysy toqtatyldy

NUR-SULTAN. QazAqparat – Óndiris ornynda qaýipsizdik talaptaryn oryndamaı kelgen 500-den astam nysan jumysyn toqtatty. Bul týraly QR Tótenshe jaǵdaılar mınıstrligi ónerkásiptik qaýipsizdik komıtetiniń tóraǵasy Nyǵmedjan Maqajanov málim etti, dep habarlaıdy QazAqparat tilshisi.

«Óndiris oryndarynda zańǵa saı memlekettik qadaǵalaý qaýiptiń aldyn alý maqsatynda júzege asyrylady. Inspektorlar óndiris oryndarynyń jumysyn teksergennen keıin tıisti shara qabyldanady. Adamdardyń ómiri men densaýlyǵyna zııan keltirý qaýpin týdyratyn ónerkásiptik qaýipsizdik talaptaryn óreskel buzǵany úshin 582 nysannyń (obekt) jumysy toqtatyldy», - dedi Nyǵmedjan Maqajanov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, qaýiptiń aldyn alýda óndiris oryndaryndaǵy tozyp, eskirgen tehnıkalyq jabdyqtardy aýystyrý mańyzdy.

«Eskirgen qural-jabdyqty isten shyǵaryp, jańaǵa aýystyrý bekitilgen josparǵa saı júrgiziledi. Bıyl óndiris nysandarynda 3 267 tehnologııalyq jabdyqty (3 152 tehnıkalyq qurylǵy jáne 115 tehnologııalyq jeli) aýystyrý josparlanǵan. Óńirler boıynsha aýystyrýǵa jatatyn jabdyqtardyń negizgi bóligi Pavlodar (653 birlik), Qaraǵandy (594 birlik) jáne ShQO-ǵa (524 birlik) tıesili», - deıdi ol.