Qaýipsizdik talaptary tolyq saqtalatyn bolsa el ıgiligi úshin bizde AES salýǵa bolady - Chernobyl AES apaty qutqarýshysy
ALMATY. 21 aqpan. QazAqparat - Chernobyl apatyn joıýǵa qatysqan qazaqstandyqtardyń qazirgi tańda 5 myńǵa jýyǵy ǵana qaldy. Bul týraly búgin Reseıdiń Almatyda Bas Konsýldyǵynda apat zardabyn joıýshylardy marapattaý kezinde aıtyldy.
«Chernobyl AES-daǵy apat zardabyn joıýǵa 35 myń qazaqstandyq qatysty. Qutqarýshylardyń qatarynda men onda Hımııalyq qorǵaý polki quramynda 1988 jyldyń qarashasynan 1989 jyldyń naýryzyna deıin 6 aı áskerı qyzmette boldym. Oǵan deıin taksoparkte jumys jasaǵam», - deıdi Ámirjan Quttybaev. Onyń aıtýynsha, qazirgi tańda Almatyda 400-deı chernobylshy qaldy. Olar jyl saıyn 26 sáýirdi, ıaǵnı apat bolǵan kúndi - qaraly kún retinde, al 7 jeltoqsandy apat ornynan áskerdiń shyǵarylǵan kúni retinde atap ótip, qurban bolǵandardy eske alyp, rýhyna taǵym etedi.
«AES apatynyń zardabyn shegip otyrsam da, osyǵan qaramastan men atomdy beıbit maqsatta qoldanýdy qoldaımyn. Bárin oılastyryp, qaýipsizdik talaptaryn saqtaıtyn bolsa, bizdiń elimizde de AES salýǵa bolady. Energetıka salasynda áli kúnge deıin álemde AES-qa balama bola alatyn birde-bir energııa kózi tabylǵan joq», - deıdi Ámirjan Beksúgiruly.
