Qaýipsizdik qyzmeti Tatarstanda teraktiniń aldyn aldy
MÁSKEÝ. Tass-QazAqparat – FQQ men ІІM Tatarstandaǵy ınfraqurylymdyq nysandardyń birinde bola jazdaǵan teraktiniń aldyn aldy. Lańkestik áreketti Reseıde tyıym salynǵan «Islam memleketi» halyqaralyq lańkestik uıymynyń eki múshesi daıyndaǵan. Kúdiktiler qolǵa tústi, dep habarlaıdy QazAqparat TASS agenttigine silteme jasap.
«RF Federaldyq qaýipsizdik qyzmeti Reseıdiń Іshki ister mınıstrligimen birlesip, buǵan deıin qozǵalǵan tergeý isiniń aıasynda Tatarstandaǵy ınfraqurylymdyq nysannyń birinde bola jazdaǵan lańkestik árekettiń aldyn aldy. Qylmys josparlanǵan jerde ony daıyndaýmen aınalysqan Reseıdiń eki azamaty ustaldy. Olar - Reseı Federatsııasynda tyıym salynǵan «Islam memleketi» halyqaralyq lańkestik uıymynyń músheleri. Kúdiktilerdiń lańkestik qurylymdardyń quramyna jergilikti turǵyndardy tartý jáne terrorızmdi nasıhattaýǵa qatysy bar bolyp shyqty» , -dedi FQQ qoǵamdyq baılanys ortalyǵy.
FQQ qoǵamdyq baılanys ortalyǵynyń málimetinshe, ustalǵan kúdiktilerden jarylǵysh zattar men qoldan jasalǵan jarylǵysh quraldar alyndy. Qazirgi tańda qajetti jedel-izdestirý sharalary men tergeý amaldary júrgizilip jatyr.
Jaqynda bas prokýrordyń birinshi orynbasary Aleksandr Býksman Bas prokýratýra alqasynyń otyrysynda Reseıdiń quqyq qorǵaý organdary bıylǵy jyldyń alǵashqy jartyjyldyǵynda 17 lańkestik árekettiń aldyn alǵanyn atap ótti.
