Qaýipsizdik keńesinde jańa aqparattyq jáne taldaý bólimderi qurylatyn bolady - M. Tájın
Bul týraly búgin Aqordada ótken Qaýipsizdik keńesiniń kezekti otyrysynan keıin jýrnalısterge QR Qaýipsizdik keńesiniń hatshysy Marat Tájın málim etti, dep habarlaıdy QazAqparat.
«Qaýipsizdik keńesiniń qyzmetin jetildirýge qatysty aıtatyn bolsaq, Prezıdent búkil álem jahandyq deńgeıde, óńirlik deńgeıde sonshalyqty salmaqty ózgeristerge ushyrap jatqan qazirgi zamanǵy jaǵdaıda strategııalyq josparlýǵa, strategııalyq boljamǵa jaýapty qurylymnyń roli aıtarlyqtaı ulǵaıatynyn atap kórsetti.
Qaýipsizdik keńesi ulttyq qaýipsizdik máselesimen baılanysty Prezıdentiń basty saıası organy bolyp tabylady. Sondyqtan Prezıdent Qaýipsizdik keńesiniń, sonyń ishinde onyń apparatynyń qyzmetin jetildirýmen jáne nyǵaıtýmen baılanysty tapsyrmalar berdi. Qaýipsizdik keńesiniń janynan jańa aqparattyq jáne jańa taldamalyq bólimsheler qurylatyn bolady», dedi brıfıngte M. Tájın.
Onyń sózine qaraǵanda, Qaýipsizdik keńesiniń vedomstvoaralyq komıssııasynyń qyzmeti birshama basqasha qurylatyn bolady. «Jalpy aıtatyn bolsaq, Memleket basshysy ulttyq qaýipsizdik salasyndaǵy úılestirýshilik jáne boljamdyq fýnktsııalarmen baılanysty máselelerdi Qaýipsizdik keńesinde shoǵyrlandyrý maqsatynda barlyq tıisti memlekettik organdarǵa óte aıqyn jáne naqty tapsyrmalar berdi», dedi M. Tájın.