Qaýipsizdik Keńesi aqparattyq jáne kólik qaýipsizdigi máselelerin qarady
ASTANA. Maýsymnyń 3-i. QazAqparat - Búgin Aqordada Qazaqstan Respýblıkasy Prezıdentiniń kómekshisi-Qaýipsizdik Keńesiniń hatshysy Marat Tájınniń tóraǵalyǵymen Qazaqstan Respýblıkasynyń Qaýipsizdik Keńesi janyndaǵy saraptamalyq keńestiń otyrysy ótti.
Kún tártibine Qazaqstannyń aqparattyq qaýipsizdigi, Kólik qaýipsizdiginiń jaı-kúıi men ony qamtamasyz etýdiń sharalary jáne Qazaqstannyń kólik áleýetine qaterler týraly máseleler engizildi.
Sarapshylar aqparattyq qaýipsizdik salasyndaǵy jahandyq úrdisterge baılanysty qaterler men problemalar bar ekenin aıtty. Olardyń pikirinshe, aqparattyq qaýipsizdiktiń mańyzdy qyry aqparattyq resýrstardy nyǵaıtý jáne damytý, olardyń ishki mazmunyn kúsheıtý, sondaı-aq Qazaqstannyń kıbernetıkalyq qaýipsizdigin qamtamasyz etý bolyp tabylady. Pikirsaıys barysynda sarapshylar memlekettiń otandyq medıa-ındýstrııany, spýtnıktik, sandyq tele- jáne radıohabar taratýdy, Internettiń qazaqstandyq segmentin damytýdy yntalandyrýynyń mańyzyn atap kórsetti.
Keńeste kólik qaýipsizdigin qamtamasyz etýdi keshendi turǵyda sheshý máselesine basa nazar aýdaryldy. Qazaqstandyq qoǵamnyń ornyqty qyzmetiniń mańyzdy qyrlarynyń biri - eldiń kóliktik-kommýnıkatsııalyq ınfraqurylymyn damytý bolyp tabylady. Osy zamanǵy geosaıası jaǵdaıda kólik qaýipsizdigi uzaq merzimge arnalǵan memlekettik múddelerdi qamtamasyz etý máselesi bolyp tabylady.
Sarapshylardyń baǵalaýynsha, Qazaqstannyń ótkizý naryǵy orasan zor memlekettermen kórshiles bolýy Shyǵys pen Batysty, Soltústik pen Ońtústikti jalǵastyratyn mańyzdy geoekonomıkalyq aımaq retinde qazaqstandyq tranzıttik áleýetti eleýli túrde arttyra túsedi. Ǵalymdar otandyq kólik ınfraqurylymyn jáne kóliktik-logıstıkalyq júıeni jańartý jáne jedeldete damytý, sondaı-aq Qazaqstannyń kólik áleýetine týdyratyn qaýipterdi zalalsyzdandyrý qajettigin atap kórsetti.
Otyrysty qorytyndylaı kelip, Sarapshylar keńesiniń tóraǵasy M.Tájın eldiń aqparattyq jáne kóliktik qaýipsizdigin qamtamasyz etý problemalaryna jan-jaqty jáne keshendi taldaý jasaý qajettigin, Qazaqstannyń kólik áleýetin tıimdi damytýdyń mańyzyn, sondaı-aq osy máseleler boıynsha ǵylymı-sarapshylyq qoǵamdastyqtyń naqty usynbalar jasaýy qajettigin atap kórsetti.
QR Qaýipsizdik Keńesi janyndaǵy sarapshylyq keńes ǵylymı, saraptamashylyq zertteý maqsatynda ulttyq qaýipsizdikti qamtamasyz etý salasynda ǵylymı-ádistemelik usynbalar ázireıtin ǵylymı-keńesshi organ.
Keńes músheleri jetekshi ǵalymdar, taldamashylar, ǵylymı-zertteý ortalyqtary men úkimettik emes uıymdardyń ókilderi.
Talqylaý barysynda Sarapshylyq keńes kún tártibindegi máseleler boıynsha usynbalar berdi, olar Qazaqstan Respýblıkasy Qaýipsizdik Keńesiniń jáne QR Qaýipsizdik keńesiniń vedomstvoaralyq komıssııalarynyń jumysynda paıdalanylatyn bolady.
