Qaýipsizdik erejesin saqtamaǵan 4 kásiporynnyń jumysy toqtatyldy

ASTANA. QazAqparat – Jyl basynan beri Tótenshe jaǵdaılar mınıstrligi ónerkásiptik qaýipsizdik salasyna 23 memlekettik qadaǵalaý júrgizip, nátıjesinde saqtyq erejesine saı kelmeıtin 374 faktini anyqtady, dep habarlaıdy QazAqparat tilshisi.

«Bıyl 1 qańtardan bastap profılaktıkalyq baqylaý nátıjeleri boıynsha jańa retteýshi saıasattyń engizilýine baılanysty sýbektiler ákimshilik jaýapkershilikke tartylmaıdy. Bul rette ákimshilik praktıka jelisi boıynsha jumys jospardan tys tekserýler men órtter kezinde zańǵa qaıshy áreketter bolǵan jaǵdaılarda ǵana jalǵasady. Baqylaý profılaktıkalyq qyzmet sheńberinde órtke qarsy jaı-kúıge 2 750 tekserý júrgizildi, 25 374 talapqa sáıkes kelmeý jaǵdaıy anyqtaldy. 2 819 adam ákimshilik jaýapkershilikke tartyldy. Onyń ishinde 358 laýazymdy tulǵaǵa 13 mln 885 myń teńge aıyppul salyndy», - dep jazylǵan mınıstrliktiń resmı saıtynda jarııalanǵan esepte.

Vedomstvo aqparatyna qaraǵanda, bıylǵy úsh aıda ónerkásiptik qaýipsizdik salasyna da 23 memlekettik qadaǵalaý júrgizilgen. Onyń nátıjesinde qaýipsizdik erejesin saqtamaǵan 374 fakti anyqtaldy, 4 nysannyń jumysy toqtatyldy, 116 fakti negizinde kásiporyndarǵa 19 mln 104 myń teńge aıyppul salynǵan.

Buǵan deıin habarlanǵanyndaı, bıyl óndiristik jáne turmystyq órtten 120 adam kóz jumdy.