«Qaýipsizdik álippesi» balalar oıynynyń úzdik stsenarııine konkýrs jarııalandy
ASTANA. Shildeniń 9-y. QazAqparat /Danıel Shaıynǵazın/ - QR ІІM Jol polıtsııasy komıteti «Qaýipsizdik álippesi» balalar oıynynyń úzdik stsenarııine konkýrs jarııalaıdy. Jyl saıyn respýblıkada jol-kólik oqıǵalarynda 180-nen asa bala qaza tabady jáne taǵy 2 myńǵa jýyǵy - túrli dárejeli jaraqattar alady. Jol polıtsııasy osyndaı qaıǵyly oqıǵalardy boldyrmaý úshin birqatar sharalardy qolǵa alýda, sonyń ishinde balalar men jasóspirimderdiń Jol qozǵalysy erejelerin bilýi jáne saqtaýǵa nasıhattaý joly, dep habarlaıdy JPK baspasóz qyzmeti.
Jalpyǵa málim, tek lektsııa jáne shaqyrýlarmen bul maqsatqa jetý múmkin emes. Sondyqtan Jol polıtsııasy komıtetiniń resmı saıtynda balalarǵa arnalǵan jáne olardyń qatysýymen jol kólik apatynyń aldyn alý jáne jol qaýipsizdigi erejelerin úırenýge baǵyttalǵan «Qaýipsizdik álippesi» (onlaın rejıminde) oıynyn jasaýǵa sheshim qabyldanǵan.
Osyǵan baılanysty ІІM Jol polıtsııasy komıteti óziniń resmı saıtynyń (www.zholpolice.kz) tutynýshylary arasynda jol qaýipsizdigi boıynsha balalar oıynynyń eń jaqsy stsenarııine konkýrs jarııalaıdy.
Jumystarǵa negizgi talaptar:
1. Balalar oıyny flesh-tehnologııalarda jáne onlaın rejıminde júzege asyrylatynyn eskerý;
2. Oıyn 6 jastan 16 jasqa deıingi balalarǵa qyzyqty jáne túsinikti bolýy tıis, qıyndyqtyń 3-5-shi deńgeıi bolýy kerek;
3. Oıynda balalardyń bilimi JQE-niń myna negizgi bólimderi boıynsha tekserilýi qajet:
- jaıaý júrginshiler erejesi;
- jolaýshylar erejesi;
- velosıpedshilerdiń erejesi;
- mektep baǵdarlamasy kólemindegi jol belgileri (ony saıttyń «Balalar jaraqaty - Muǵalimder úshin» bóliminen qaraýǵa bolady).
Konkýrstyń qorytyndylary 2010 jyldyń tamyzynda shyǵarylady.
Eń jaqsy stsenarıı (stsenarııler) «Qaýipsizdik álippesi» balalar oıynyn jasaǵanda paıdalanylady, jeńimpazdardyń esimderi - Jol polıtsııasy komıtetiniń resmı saıtynda jarııalanady.
