«Qaýipsiz jol» jedel-profılaktıkalyq is-sharasynyń qorytyndysy shyǵaryldy
ASTANA. Tamyzdyń 17-si. QazAqparat - Qazaqstan Respýblıkasy ІІM joldarda apattylyqtyń jaı-kúıin turaqtandyrý maqsatynda 2010 jylǵy tamyzdyń 9-15-i aralyǵynda «Qaýipsiz jol» jedel-profılaktıkalyq is-shara ótkizdi, dep habarlaıdy Qazaqstan Respýblıkasy ІІM Jol polıtsııasy komıtetiniń baspasóz qyzmeti.
Jedel-profılaktıkalyq is-sharany ótkizýge 1621 uıym qatysty, onyń ishinde 1027-i memlekettik emes mekemeler. Olardyń ishinde tótenshe jaǵdaılar jónindegi, bilim, densaýlyq saqtaý, jolaýshylar tasymaldaý jáne avtomobıl joldarynyń aýmaqtyq organdary, kólik jáne jol uıymdary, saqtandyrý kompanııalary, qoǵamdyq jáne basqa da uıymdar bar.
Joldarda júrý mádenıetin tárbıeleýde halyqqa bilim jáne aqparat berý maqsatynda 99313 dana taralymmen 574 kórneki úgit-nasıhat materıaldary basylyp, olar jol qozǵalysyna qatysýshylardyń arasynda taratyldy. Kósheler men joldardyń boıyna júrgizilip jatqan is-sharalar men apattylyqtyń jaǵdaıy týraly aqparattary bar 1040 plakat, panno jáne bılbord ornatyldy.
Joldarda jol polıtsııasy jasaqtarynyń sany kóbeıtildi, jeke quramnyń jumysy jol-kólik oqıǵalarynyń (JKO) bolýyna soqtyratyn Jol qozǵalysy erejelerin (JQE) eń qaýipti buzýshylyqtardy aıqyndaý men jolyn kesýge baǵyttaldy.
Іs-sharalar ótkizý kezinde JQE-ny buzýshylyqtyń 52 myńnan astam faktisi aıqyndaldy, sonyń ishinde 1669 buzýshylyq kólikti alkogoldik mas kúıde júrgizgeni úshin, 11743 fakti jyldamdyqty asyrǵany úshin, qarsy joldyń baǵytyna shyqqany úshin 838 júrgizýshi ákimshilik jaýapkershilikke tartyldy, kólik quraldaryn tıisti qujattarsyz basqarýdyń 3348 faktisi aıqyndaldy. JQE men kólikti paıdalanýdyń jolaýshylar kóliginiń júrgizýshilerimen jasalǵan 2184 buzýshylyq, memlekettik kóliktiń júrgizýshilerimen jasalǵan 1146 buzýshylyq aıqyndaldy. Sondaı-aq is-sharany ótkizý kezinde JQE buzǵandyǵy úshin 1600-den astam jaıaý júrginshiler ákimshilik jaýapkershilikke tartyldy.
Jol polıtseıleriniń qatysýymen 325 qylmys ashylyp, al tikeleı jol polıtsııasy qyzmetkerleri 24 qylmysty ashty.
