«Qaýipsiz jol» respýblıkalyq is-sharasy barysynda Jol qozǵalysy erejesiniń 48 myńnan astam buzýshylyǵy anyqtaldy
ASTANA. 2 qarasha. QazAqparat - QR ІІM jol-kólik oqıǵalaryn azaıtý jáne onyń saldarynyń aýyrtpalyǵyn tómendetý maqsatynda 2012 jyldyń 24-29 qazan kúnderi aralyǵynda respýblıka aýmaǵynda «Qaýipsiz jol» respýblıkalyq is-sharasyn ótkizdi.
Bul týraly vedomstvonyń baspasóz qyzmetinen málim etti.
Іs-sharalarǵa ishki ister organdarynyń 8 myńnan astam qyzmetkeri, onyń ishinde 5,5 myń jol polıtsııasy saptyq bólimsheleriniń qyzmetkerleri qatysty.
«Taldaý kórsetkendeı, elimizde jol qozǵalysy qaýipsizdigi jaǵdaıyn anyqtaıtyn negizgi faktor - kólik júrgizýshileriniń Jol qozǵalysy erejelerin óreskel buzýy. Olardyń kinási boıynsha 2012 jyldyń basynan bastap 8,5 myń JKO tirkeldi, bul barlyq oqıǵalardyń 87%-yn quraıdy»,- dep atap ótti ІІM Jol polıtsııasy komıtetiniń tóraǵasy Berik Bısenqulov.
Profılaktıkalyq is-shara ótkizý kezeńinde qyzmetkerler Jol qozǵalysy erejeleriniń 48 myńnan astam buzýshylyǵynyń jolyn kesti. Onyń ishinde 1 375 kólik quralyn mas kúıinde basqarý, 11 561 jyldamdyqty asyrý, 3088 basyp ozý erejelerin buzý, 887 joldyń qarsy baǵytyna shyǵý erejelerin buzý, 652 kólik quraldarynyń terezelerin qarańǵylaý, 3 336 kólik quralyn basqarý kezinde uıaly telefon paıdalaný, 6 908 qaýipsizdik beldikterin taqpaý, 429 apattyq jaǵdaı jasaý, 996 qozǵalys kezinde jaıaý júrginshilerge jol bermeý faktilerine qatysty.
Osyǵan baılanysty ІІM-niń Jol polıtsııasy komıteti kólik quralyn mas kúıinde basqarý, joldyń qarsy baǵytyna shyǵý, jyldamdyq rejımin buzý, qıylystar men jaıaý júrginshiler ótpelerinen ótý erejelerin buzǵany úshin ákimshilik jaýapkershilikti aıtarlyqtaı kúsheıtý boıynsha usynystar ázirledi. JQE-ny óreskel buzǵany úshin kólik quralyn basqarýdan aıyrý jáne ákimshilik qamaýǵa alý merzimderin uzartý josparlanýda. Bul rette, JQE buzýshylyqtarynyń negizgi túrlerin quqyq buzýshylyqtardy tehnıkalyq quraldarymen tirkeý kómegimen anyqtaý josparlanǵan.
«Júrgizýshi buzýshylyq jasaǵany úshin sáıkes jazalaý bolatynyn seziný kerek, sebebi jolda ádepsiz júrý jáne jaýapkershilikti sezinbeý saldary qaıǵyly oqıǵalarǵa alyp keledi», - dep Berik Bısenqulov atap ótti.
JKO-nyń aldyn alý boıynsha jumys jalǵasýda. Osylaısha, 5-11 qarasha aralyǵynda balalardyń jol-kólik oqıǵalarynda jaraqattanýynyń aldyn alý maqsatynda mektep demalysy kezinde respýblıka boıynsha «Demalys» aldyn alý aktsııasy ótkiziledi. Al, 12-18 qarasha aralyǵynda «Jol qozǵalysynyń qaýipsizdik aptalyǵy» atty keń kólemdi nasıhat kampanııasy ótkiziledi. Ol BUU Qararyna sáıkes qarashanyń úshinshi jeksenbisinde atalyp ótetin Búkilálemdik JKO qurbandaryn eske alý kúninde birqatar profılaktıkalyq is-sharalar ótkizýmen aıaqtalady.
«Biz JKO faktilerin aıtyp qana qoımaı, olardyń aldyn alýǵa baǵyttalǵan jumystar atqarýymyz qajet», - dedi Jol polıtsııasy komıtetiniń tóraǵasy Berik Bısenqulov.
