«Qaýipsiz jol» aptalyǵy barysynda jol erejesiniń 60 myńnan astam buzylǵandyǵy anyqtaldy
ASTANA. Sáýirdiń 20-sy. QazAqparat - «Qaýipsiz jol» aptalyǵy barysynda jol erejesiniń 60 myńnan astam ret buzylǵandyǵy anyqtaldy, dep habarlady QR ІІM Jol polıtsııasy komıtetinen.
«Іshki ister mınıstrligi aǵymdaǵy jyly sáýirdiń 12-18-i aralyǵynda «Qaýipsiz jol» jedel aldyn alý is-sharasyn ótkizdi. Іs-sharanyń maqsaty - jol apattarynyń deńgeıin tómendetý. Іs-sharalardy ótkizýge 2 myńnan astam uıymdar qatysty, onyń ishinde 1 myńnan astamy memlekettik emes mekemeler», delingen baspasóz habarlamasynda.
Jol polıtsııasy bólimsheleriniń jeke quramy qalalyq jáne aýyldyq jerlerde jasaqtardyń sanyn arttyrý arqyly kúsheıtilgen nysanda jumys atqardy. Shara barysynda jol erejesiniń 60 myńnan astam buzylǵandyǵy anyqtaldy. Onyń ishinde 2 myńǵa jýyq buzýshylyq kólikti alkogoldik masań kúıde basqarǵany úshin, 4,5 myńy - qujatsyz basqarǵany úshin, 12,8 myń fakti - jyldamdyqty asyrǵany úshin, 811-i - qarsy jolaqqa shyqqany úshin, 206-i - toqtaý jónindegi talaptardy oryndamaǵany úshin jaýapkershilikke tartyldy. 1845 buzýshylyq jolaýshylar kóliginiń júrgizýshilerimen jáne 763 buzýshylyq memlekettik kóliktiń júrgizýshilerimen jasalǵany anyqtaldy.
Іs-shara barysynda avtojoldardyń 28 myń shaqyrymyn qamtý arqyly myńnan astam kóshe-jol jelisi tekserildi jáne 499 temirjol ótpeleri zertteldi. Joldardy kútip-ustaýdaǵy kemshilikterdi joıý jóninde 903 uıǵarym berilip, kóshe-jol jelisi men temirjol ótpelerin nashar ustaǵandary úshin ákimshilik jaýapkershilikke 250-ge jýyq adam tartyldy.
Aldyn alý maqsatynda 115 myń dana tırajben 790 kórneki úgit quraldary basyp shyǵarylyp, myńnan astam plakattar men pannolar ornatyldy. Mektepterde 4,5 myń, eńbek ujymdarynda 3 myń áńgimelesýler men lektsııalar, jol qozǵalysynyń qaýipsizdigi jóninde bilim qyzmetkerleri úshin 265 semınarlar, balalar arasynda jol qozǵalysy erejeleriniń bilimi jóninde 953 konkýrstar men suraq-jaýap oıyndary ótkizildi.
