«Qaýipsiz tereze» aktsııasy: ShQO-da kópbalaly otbasylardyń úıine qorǵanys quraldary ornatyldy

ÓSKEMEN. QazAqparat – Shyǵys Qazaqstan oblysynda qutqarýshylar kópqabatty úılerde turatyn kópbalaly otbasylardyń terezelerine arnaıy qorǵanys quraldaryn ornatty, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha balalar terezeden qulap ketken oqıǵalar az bolyp jatqan joq. Osyǵan alańdaǵan qutqarýshylar arnaıy aktsııa ótkizdi.

«Qaýipsiz tereze» aktsııasy aıasynda kópqabatty úılerde turatyn kópbalaly otbasylardyń terezelerine jazataıym oqıǵalardan saqtaıtyn qorǵanys quraldary ornatyldy. Bundaǵy maqsat – búldirshinderdiń qaýipsizdigin saqtaý, ata-analardyń nazaryn balalardy qaraýsyz qaldyrmaý máselesine aýdarý. Óıtkeni qaıǵyly jaǵdaılardyń basty sebebi – eresekterdiń jaýapsyzdyq tanytýynan», - dep habarlady vedomstvo ókilderi.

Departament qyzmetkerleri atalmysh aktsııaǵa basqa uıymdar men kásiporyndarǵa qoldaý kórsetýge shaqyrdy.

«Osy rette, ata-analarǵa bólmede bala bolsa, terezelerdi ashyq qaldyrmaý qajettigin eskertemiz. Terezeniń tutqasyn bala ózdiginen asha almaıtyndaı etip bekitińiz. Terezelerdiń ashylýyna jol bermeý úshin arnaıy qorǵanys quraldaryn ornatyńyz», - delingen aqparatta.

Esterińizge sala ketsek, osyǵan deıin Shyǵys Qazaqstanda sońǵy úsh jylda 24 bala terezeden qulap ketkenin habarlaǵan bolatynbyz.