«Qaýipsiz qala» jedel aldyn alý is-sharasy barysynda elordalyq saqshylar 1569 adamdy ákimshilik jaýapkershilikke tartty

dep habarlady Astana qalalyq ishki ister departamentiniń memlekettik til jáne aqparat bóliminen.

Atalǵan shara bastalǵannan beri ishki ister organdarynda esepte turǵan 3658 azamattyń meken-jaılary tekserilip, jalǵa beriletin 6955 páterdiń turǵynymen profılaktıkalyq áńgime uıymdastyryldy. Sondaı-aq 8853 jertóle, káriz jáne úı shatyrlary tekserilip, qańǵybastyqqa salynǵan 211 azamat anyqtaldy.

Esterińizge sala keteıik, elordalyq saqshylar qoǵamdyq qaýipsizdikti jáne azamattardyń tynyshtyǵyn qamtamasyz etý maqsatynda qazannyń 4-i men 8-i aralyǵynda «Qaýipsiz qala» jedel aldyn alý sharasyn ótkizýde. Bul bastamaǵa bilim berý, prokýratýra, medıtsına, salyq, qylmystyq atqarý júıesiniń mamandary da óz úlesterin qosýda. Qoǵamdyq tynyshtyqty qamtamasyz etýge 1712 adam jumyldyrylsa, onyń 1300-den astamy quqyq qorǵaýshylar.