«Qaýipsiz qala» sharasy aıasynda qyrǵyz mıgranttarynyń kezekti toby eline qaıtaryldy - Almaty
ALMATY. Qazannyń 5-i. QazAqparat /Erbol Turymbetov/ - Almatyda qolǵa alynǵan «Qaýipsiz qala» jedel-profılaktıkalyq sharasynyń birinshi kúni-aq elimiz aýmaǵynda zańsyz júrgen qyrǵyzstandyq azamattar toby qolǵa tústi.
Qala bazarlaryn tekserý barysynda myńǵa jýyq qyrǵyz eliniń zańsyz eńbek mıgrattary ustaldy, dep habarlaıdy Almaty qalalyq ІІD-niń baspasóz qyzmeti.
«Belgili bolǵandaı, olardyń Ózbekstan, Qyrǵyzstan jáne Tájikstannan jaqynda ǵana Almatyǵa jumys tabýǵa kelgendikteri anyqtaldy. Buryn mıgranttar qurylys nysandarynda kóptep kezdesetin bolsa, endi bazarlarda, jeke qurylystarda jáne kópshilik tamaqtanatyn jerlerde qaptaı bastady. Sondyqtan, osy shara barysynda osyndaı jerler bizdiń qatań baqylaýymyzǵa alynyp, muqııat tekseriledi», dedi Almaty qalalyq ІІD Kóshi-qon polıtsııasy basqarmasynyń bastyǵy podpolkovnık Marat Kezimbaev.
Búginde qazaq-qyrǵyz shekarasyna sottyń sheshimimen elden shyǵarylýy tıis eńbek mıgrantary toltyrylǵan alǵashqy 2 avtobýs jiberildi. Qazir endi Ózbekstan men Tájikstannan kelgenderdi shyǵarý júrip jatyr.
«Mıgratsııalyq máselelerdiń qaladaǵy qylmystyq jaǵdaılarǵa áser etetini belgili. Soǵan baılanysty, mıgratsııalyq baqylaý kúsheıtildi. Jyl basynan beri osyndaı zań buzýshylyqqa jol bergenderdiń 23 myńy ákimshilik-quqyqtyq jaýapkershilikke tartylyp, 2 myńnan astamy elden shyǵaryldy jáne 2 myńǵa jýyǵyna Qazaqstan aýmaǵynda júrýge shekteý qoıyldy. Nátıjesinde mıgranttar legin toqtata aldyq », dedi Marat Kezimbaev.
Esterińizge sala keteıik, «Qaýipsiz qala» keń kólemdi jedel-profılaktıkalyq sharasy qalanyń krımınaldyq jaǵdaıynyń jaqsarýyna jáne qylmystyq oqıǵalardy shekteýge baǵyttalǵan. Ol qazan aıynyń 8-ine deıin jalǵasatyn bolady.
