Qaýipsiz qala: Qaraǵandy oblysynda úsh myńnan astam kamera ornatylady

QARAǴANDY. QazAqparat – 2021-2023 jyldary Qaraǵandy oblysynda «Qaýipsiz qala» jobasyn iske asyrý josparlanyp otyr. Osy maqsatta óńirde turǵyndardyń qaýipsizdigin qadaǵalaý úshin 3 myńnan astam beınekamera ornatylmaq, dep habarlaıdy QazAqparat tilshisi.

Kameralar qoǵamdyq oryndarda ornatylady jáne olar jol qaýipsizdigi úshin ǵana emes túrli qylmystar men zańbuzýshylyqtardyń aldyn alý úshin de paıdalanylady.

Kameralarǵa túsken málimetter oblystyń barlyq quqyq qorǵaý jáne zań organdaryna túsedi.

Joba tehnıkalyq quraldardy paıdalana otyryp, naqty jaǵdaıǵa monıtorıng júrgizip, túrli qylmystar men quqyq buzýshylyqtardyń aldyn alýǵa jáne olardy ashý úshin qajetti derekterdi izdeýge, qandaı da bir oqıǵany jan-jaqty saralaýǵa múmkindik beredi. Osyǵan qaraı, 3 223 kamera arqyly kelgen beınebelgilerdi saqtaý men óńdeýdiń biryńǵaı ortalyǵyn, jol qozǵalysy erejesin buzý áreketterin tirkeýdiń 100 keshenin jáne 33 shuǵyl baılanys termınalyn qurý kózdelip otyr.

Ol úshin Qaraǵandy oblysynyń aqparattandyrý, memlekettik qyzmetter jáne arhıvter basqarmasy Qaraǵandy, Temirtaý, Jezqazǵan, Sátbaev, Saran qalalarynda jáne Osakarovka kentinde beınebaqylaý kameralarynan sıgnaldar alatyn biryńǵaı ortalyqtandyrylǵan júıe qurý boıynsha qyzmet kórsetýshiler arasynda konkýrs jarııalady.

«Joba birneshe kezeńge bólinip, úsh jyl ishinde iske asyrylatyn bolady. Oǵan apparattyq-baǵdarlamalyq keshendi engizý, beınebaqylaý kameralarynan sıgnal alý úshin ınfraqurylym qurý (kabel tóseý), qajetti jabdyqty (beınebaqylaý kameralary, kameralardy montajdaý, qyzmet kórsetý jáne t.b.) jáne perıferııalyq qurylǵylardy satyp alý is-sharalary kiredi. Joba aıasynda qoldanystaǵy beınebaqylaý kameralary jańǵyrtylady, jyldamdyq rejıminiń artýyn, jol qozǵalysy erejelerin buzýdy jáne t. b. tirkeı alatyn jańa kameralar ornatylady», - dep málimdedi Qaraǵandy oblysynyń aqparattandyrý, memlekettik qyzmet kórsetý jáne arhıvter basqarmasynyń ókilderi.