«Qaýipsiz qala»: Astana kóshelerine 7500 kamera ornatylady
NUR-SULTAN. QazAqparat - Nur-Sultanda «Qaýipsiz qala» jobasy aıasynda 7500 beınebaqylaý kamerasy ornatylady. QazAqparat bul týraly elorda ákimdiginiń resmı saıtyna silteme jasap habarlaıdy.
Búgingi tańda qalada pılottyq jobada 1100-den astam beınebaqylaý kamerasy jumys isteıdi. Beınekameralardy mekenjaılar men nysandarǵa ornatý aýdan ákimdikteri men Nur-Sultan qalasynyń Polıtsııa departamenti usynǵan tizim boıynsha júrgiziledi.
«Tájirıbe kórsetip otyrǵandaı, kún sanap damyp jatqan álemde quqyq buzýshylyqtyń aldyn alý isine den qoıý qajet. Beınebaqylaý kameralaryna ıelik etý Jedel basqarý ortalyǵyna (JBO) jáne Nur-Sultan qalasynyń Polıtsııa departamentine berildi. Onda operatorlar kezekshilik etedi. Olar oqıǵa bolǵan bette osy aýdandaǵy polıtsııa qyzmetkerlerine dereý habar beredi», - dep atap ótti elordalyq Tsıfrlandyrý basqarmasynyń basshysy Botagóz Qasabek.
Qaýipsiz qala» jobasy – biriktirilgen beınetirkeý júıesi. Derekterdi óńdeý júıesi ártúrli jaǵdaıda tıimdi jumystardy uıymdastyrýǵa múmkindik beredi. Qaýipsizdikti qamtamasyz etýden basqa, joba qalanyń tynys-tirshiligine analız júrgizýdi avtomattandyrýǵa, sondaı-aq sonyń negizinde sheshimder qabyldaýǵa múmkindik beredi. Beınekameralar táýlik boıy qosýly bolady.
«Qaýipsiz qala» jobasy iske qosylǵan sátten bastap oń nátıje baıqalady. Máselen, 2021 jyldyń birinshi toqsanynda qylmystyń ashylýy jaqsardy, qoǵamdyq oryndarda jasalǵan qylmystardyń sany 53% (8 502-den 4 000-ǵa deıin), kóshelerde jasalǵan qylmystardyń sany 48,2% (3 381-den 1 752-ge deıin) azaıdy. 2020 jyly tirkelgen qylmystar sany 30% tómendedi.
