Qaýipsiz aýla: Elorda polıtseıleri 600-den astam quqyqbuzýshylyq tapty
NUR-SULTAN. QazAqparat – Elordalyq polıtseıler ár aptanyń juma jáne senbi kúnderi «Qaýipsiz aýla» jedel aldyn alý sharasyn ótkizedi. Basty nazar qoǵamdyq oryndar men kóshelerde quqyqtyq tártipti qamtamasyz etýge, turmystyq qylmys pen basqa da quqyqbuzýshylyqtardyń aldyn alýǵa aýdarylady, dep habarlaıdy QazAqparat.
«Úkimettik emes uıymdar ókilderin tarta otyryp, maqsatty aktsııalar ótkiziledi. Mysaly, turmystyq zorlyq-zombylyqtyń aldyn alý úshin ótken aptada «Zorlyq-zombylyqsyz úı» aktsııasy ótti. Nátıjesinde 660-tan astam ákimshilik quqyqbuzýshylyq anyqtaldy, onyń ishinde qorǵaý nusqamasyn buzǵany úshin 6 otbasylyq basbuzar jaýapqa tartyldy, jalpy paıdalaný oryndaryn lastaǵan 68 azamat jáne spırttik ishimdik iship, qoǵamdyq oryndarǵa mas kúıinde kelgeni úshin 98-den astam adam ustaldy», - dedi QR Іshki ister mınıstrliginiń resmı ókili Nurdildá Oraz aptalyq brıfıngide.
Buǵan deıin N. Oraz bir aptada 3055 qylmys jasalǵanyn, onyń 1978-i táýlik ishinde ashylǵanyn habarlaǵan edi.
