Qaýip tobyndaǵy barlyq naýqastar dári-dármekpen tolyq qamtylady– farmakolog
ALMATY. QazAqparat – Almatyda qaýip tobyndaǵy barlyq patsıentter dári-dármekpen tolyq qamtamasyz etiledi. Bul týraly óńirlik kommýnıkatsııalar qyzmeti alańyndaǵy onlaın-suhbat barysynda №4 qalalyq emhananyń klınıkalyq farmakology Áıgerim Toqtybaeva aıtty, dep habarlaıdy QazAqparat tilshisi.
Onyń aıtýynsha, búgingi kúni № 4 qalalyq emhanada 85 437 adam tirkelgen. Onyń ishinde dıspanserlik esepte 17 060 patsıent 45 nozologııa boıynsha tur.
«Pandemııa kezinde bizdiń emhana 338 273 364 teńgege 68 nozologııa boıynsha 10 140 patsıentti dárilik zattarmen qamtamasyz etti. Bul topqa 0-den 96 jasqa deıingi naýqastar kiredi. Belgili bir aýrýlary bar dıspanserlik esepte turǵan patsıentter, tegin medıtsınalyq kómektiń kepildik berilgen kólemi men mindetti áleýmettik medıtsınalyq saqtandyrý júıesi sheńberinde, QR Densaýlyq saqtaý mınıstrliginiń buıryǵymen bekitilgen dárilik zattar men medıtsınalyq buıymdardyń tizbesine sáıkes, tegin dárilik zattarmen jáne medıtsınalyq buıymdarmen qamtamasyz etiledi», — dep atap ótti Á. Toqtybaeva.
Belgili bir aýrýlary bar azamattardyń jekelegen sanattary ambýlatorııalyq deńgeıde tegin jáne jeńildiktegi dárilik zattarmen jáne medıtsınalyq buıymdarmen qamtamasyz etiledi.
Sonymen qatar, koronavırýs ınfektsııasyna baılanysty ambýlatorııalyq deńgeıde tegin beriletin bes ataý boıynsha preparattardyń tizimi anyqtaldy.
«Olardyń ishinde úsh antıkoagýlıanttyq preparat-apıksaban, rıvaroksaban, dabıgatran jáne antıpıretıkter – paratsetamol, ıbýprofen bar. Bul preparattardyń barlyq ataýlary koronavırýs ınfektsııasy bar adamdarǵa tegin beriledi», – dep túsindirdi Á.Toqtybaeva.
