Káýap jasaýdan Gınnestiń álemdik rekordy jańartyldy
KÓKShETAÝ. QazAqparat - Aqmola oblysynda elimizdegi eń iri Makınsk qus fabrıkasy iske qosyldy. Osyǵan oraı, kásiporynnyń 200-den astam qyzmetkeri taýyq etinen uzyndyǵy 223 metrlik káýap daıyndap, jańa álemdik rekord ornatty. Bul resmı túrde Gınnestiń álemdik rekordtar kitabynda tirkeldi, dep habarlaıdy QazAqparat tilshisi.
Kásiporynnyń BAQ-pen baılanys jáne PR menedjeri Málıke Bóldekbaevanyń aıtýynsha, káýap daıyndaý úshin 400 kılogramnan astam taýyq eti paıdalanylǵan. Alǵashynda uzyndyǵy 220 metr káýap daıyndaý josparlansa, keıin bul kórsetkish 223 metr 65 santımetrge jetkizildi.
«Sharaǵa Gınnestiń álemdik rekordtaryn uıymdastyrýdaǵy resmı tóreshi Paýlına Sapınskaıa qatysyp, arnaıy sertıfıkat tapsyrdy», dep jaýap qatty Málıke Bóldekbaeva QazAqparat tilshisiniń saýalyna.
Aıta ketý kerek, rekordtar kitabyna engen aldyńǵy rekord 2007 jyly Sıngapýrde jasalǵan edi. Sol kezdegi káýaptyń uzyndyǵy 140 metrdi qurady, keıin bul rekord Reseıde jańartylyp, 170 metrge jetti.
Eske sala keteıik, búgin Indýstrııalandyrý kartasy aıasynda elimizdegi jáne Ortalyq Azııadaǵy eń iri qus fabrıkasy iske qosyldy. Bulandy aýdanynda ashylǵan «Makınsk qus fabrıkasy» JShS-niń jyldyq qýaty 50 myń tonna qus etin óndirýge múmkindik beredi. Mańyzdy jobany júzege asyrý óńirde jańa jumys oryndaryn ashyp, óndiristi damytýǵa serpin beredi dep kútilýde. Sonymen qatar, atalǵan joba Astana qalasy aınalasynda azyq-túlik beldeýin damytýǵa septigin tıgizbek.
