Katıýshadan Ýralǵa deıin: Óskemendegi eski tehnıkalar qoıylǵan retro-mýzeıden fotoreportaj
ÓSKEMEN. KAZINFORM — Óskemende ashylǵan Retro-mýzeı alǵashqy kúnnen-aq halyqtyń otbasymen keletin jerine aınalǵandaı. Bir jerde ákesi balasyna eski kóliktiń qalaı jumys istegenin túsindirse, endi bir jerde kelýshiler «Katıýshanyń» aldynda uzaq aıaldaıdy. Kazinform tilshisi mýzeıge baryp, fotoreportaj jasap qaıtty.
Soljaǵalaý saıabaǵy aýmaǵynda ornalasqan ashyq ekspozıtsııada ótken ǵasyrdyń áskerı jáne azamattyq tehnıkasynyń 28 úlgisi qoıylǵan.
Munda tank, zeńbirek, brondy avtomobıl, mototsıkl, júk jáne jeńil kólikter bar.
Mýzeıdiń ereksheligi — tehnıkany áınek astynan emes, ashyq keńistikte kórýge bolady. Sondyqtan olardyń kólemi men qurylymyn jaqynnan sezinýge múmkindik bar.
«Katıýsha» — ekspozıtsııanyń basty tehnıkalarynyń biri
Kireberiste birden kózge túsetin eksponattardyń biri — BM-13 «Katıýsha».
ZıS-6 júk avtomobıliniń shassıine ornatylǵan bul reaktıvti artıllerııalyq júıe soǵys jyldaryndaǵy eń tanymal qarýlardyń birine aınaldy. Bir dúrkin atqanda 16 reaktıvti snarıad jiberip, 8,4 shaqyrymǵa deıingi qashyqtyqtaǵy nysanaǵa tıgize alǵan.
Búginde ol mýzeı aýmaǵynda tur. Biraq janyna baryp qaraǵanda, tehnıkanyń aýqymy birden baıqalady.
«Katıýshanyń» qasynda turǵan ZıS-6 júk kóligi de kezdeısoq tańdalmaǵan. Dál osy model soǵys jyldarynda reaktıvti qondyrǵylardy ornalastyrý úshin paıdalanylǵan kólikterdiń biri boldy.
Tankten zenıttik zeńbirekke deıin
Ekspozıtsııada 1942 jylǵy T-60 jeńil tank te bar. Soǵys jyldarynda ol barlaý, jaıaý áskerdi qoldaý jáne baılanys mindetterin atqarǵan.
Balalardyń tankke degen qyzyǵýshylyǵy erekshe. Biri shynjyr tabanyna úńilse, endi biri munarasyna qarap, ata-anasyna suraq qoıyp jatyr.
Al 45 mm M-42 tankige qarsy zeńbiregi soǵys tehnıkasynyń basqa qyryn kórsetedi. Salmaǵy 625 keli bolatyn qarý brondalǵan tehnıkaǵa qarsy qoldanylǵan.
Jaqyn turǵan kezde onyń qarapaıym kórinetin qurylymynyń artynda sol kezeńdegi áskerı ınjenerııa jatqanyn ańǵarýǵa bolady.
Ekspozıtsııadaǵy BA-64 brondy avtokólik te nazar aýdartady. Ol barlaý, baılanys jáne jaıaý ásker bólimderine qoldaý kórsetý úshin paıdalanylǵan. Tasjolda saǵatyna 80 shaqyrymǵa deıin jyldamdyqpen júre alǵan.
Soǵystan keıingi kezeńniń «Ýraly»
Áskerı tehnıkanyń arasynan tanys «Ýral» mototsıkli de kózge túsedi.
M-72 negizinde jasalǵan bul mototsıkl búıir tirkemesimen birge 330 keli salmaq tartyp, 260 kelige deıin júk kótere alǵan. Keıin mundaı tehnıka beıbit ómirde de jolsyz jerlerde paıdalanyldy.
Sondyqtan mýzeıdegi kólikter tek soǵys tarıhyn emes, ótken ǵasyrdaǵy kúndelikti ómirdi de eske salady.
Munda GAZ-67B jol talǵamaıtyn kóligi, GAZ-M-1 jeńil avtokólik jáne basqa da keńestik tehnıka úlgileri bar.
Ekspozıtsııada sheteldik tehnıka da kezdesedi. Atap aıtqanda, lend-lız arqyly KSRO-ǵa jetkizilgen amerıkalyq Studebaker júk kólikteri men Diamond T 980 aýyr júk tartqyshyn kórýge bolady.
Tarıhty ekrannan emes, kózben kórý
Mýzeı aýmaǵynda júrgende kelýshilerdiń reaktsııasy bir nárseni ańǵartady. Osyndaı tehnıkany sýretten kórý bir bólek, janyna baryp kórý múlde basqa áser.
Ásirese balalar úshin bul tarıh sabaǵynyń ózgeshe formasy. Olar tehnıkanyń ataýyn ǵana bilip qoımaı, onyń kólemin kórip, qurylymyna úńilip, ata-anasyna suraq qoıady.
Al eresekter úshin ekspozıtsııa ótken ǵasyrdyń tehnıkasyn eske túsiretin orynǵa aınalǵan.
Bir alańda turǵan «Katıýsha», T-60, BA-64, M-42, «Ýral», ZıS-6 jáne amerıkalyq tehnıkalar birneshe tarıhı kezeńdi bir jerge jınaǵandaı áser qaldyrady.
Buǵan deıin áskerı-patrıottyq ortalyqtan fotoreportaj usynǵan edik.
