Qatty jeldiń saldarynan 12 kún buryn jylýsyz qalǵan ShQO Solnechnyı kentiniń abonentterine jylý búgin beriledi - TJM
ASTANA. Qańtardyń 23-i. QazAqparat - Borap soqqan qatty jeldiń saldarynan 12 kún buryn jylýsyz qalǵan Shyǵys Qazaqstan oblysy Solnechnyı kentindegi abonentterge jylý búgin, qańtardyń 23-i kúni beriledi dep ýáde etilýde.
Esterińizge sala keteıik, qańtardyń ótken 12-si kúni Jarma aýdany Solnechnyı aýylynda qatty borap soqqan jeldiń saldarynan elektr jetkizýshi jeliler úzilip, ol jylytý trassasynyń qatýyna alyp kelgen. Nátıjesinde 4 túzetý mekemesi men kópqabatty 8 turǵyn úı jylýsyz qaldy.
QR Tótenshe jaǵdaılar mınıstrligi baspasóz qyzmetiniń málimdeýinshe, qańtardyń 22-si keshki saǵat 20.00-ge deıin jylý trassasynyń 20 metr bóligi qaıta aýystyrylǵan.
Tótenshe jaǵdaıdy joıýǵa barlyǵy 90-ǵa jýyq adam men 12 tehnıka, sondaı-aq jyljymaly jáne statsıonarlyq 9 dánekerleý apparaty jumyldyryldy.
Magıstral búgin, qańtardyń 23-i kúni iske qosylady dep kútilýde.
