Qatty jel Óskemendegi jańa aıaldamalardy qulatty
ÓSKEMEN QazAqparat - Búgin Óskemende qatty jel turyp, jańadan ornatylǵan aıaldamalar men jaryq baǵandaryn qulatty, dep habarlaıdy QazAqparat tilshisi.
Tús kezinde bastalǵan qatty jel arakidik soǵyp, kóshedegi aıaldamalar men aǵashtardy, jaryq baǵany men kórneki quraldardy qıratqan. Áleýmettik jelige oqıǵa oryndarynan sýretter men vıdeolar tarap úlgerdi.
Abaı dańǵylynda jaryq baǵanasy qulasa, Almaty kóshesiniń aýlasynda aǵash tamyrymen qoparylǵan. Al Bajov kóshesi men Jibek matalar kombınaty aýdanynda jýyqta ǵana ornatylǵan aıaldamalar aýdarylyp qaldy.
Qalada qatty jel turyp, jyldamdyǵy 20-25 m\s-qa deıin jetetini týraly bir kún buryn tótenshe jaǵdaılar departamenti eskertken bolatyn. Erteń de oblys kóleminde 15-20 m\s jyldamdyqpen jel soǵady dep kútilýde.
