Qatty turmystyq qaldyqtardy basqarý salasynda membaǵdarlama ázirlenbek
NUR-SULTAN. QazAqparat - Búgin elorda ákimi Altaı Kólginov Qazaqstan Respýblıkasynyń Ekologııa, geologııa jáne tabıǵı resýrstar mınıstri Maǵzum Myrzaǵalıevpen birge turmystyq qaldyqtardy óńdeý keshenine bardy, dep habarlaıdy qala ákiminiń resmı saıty.
Qazaqstan Respýblıkasynyń qaldyqtarmen jumys isteý salasyndaǵy memlekettik saıasaty «jasyl» ekonomıkaǵa kóshý tujyrymdamasynda aıqyndalǵan jáne qaldyqtardy jeke jınaýdy engizýge, qaldyqtardy qaıta óńdeý sektoryn damytýǵa, onyń ishinde memlekettik-jekeshelik áriptestik arqyly qaıta óńdeý ónimderin óndirýge baǵyttalǵan.
Qazaqstannyń astanasyndaǵy qaldyqtardy qaıta óńdeý boıynsha zaýyt - qaıtalama shıkizatty qalpyna keltirý arqyly qatty qaldyqtardy suryptaýdy júzege asyratyn, sondaı-aq suryptalǵan plastmassalardy óńdeýge arnalǵan óndiristik nysandary bar qalanyń jalǵyz kásiporny. Elordada 65 qoqys shyǵaratyn kompanııadan keshenge kún saıyn 950 tonna QTQ túsedi. Qazaqstanda ótkiziletin is-sharalar qatty qaldyqtardy qaıta óndeý úlesin 2018 jyly 11,51% -ǵa deıin arttyrýǵa múmkindik berdi, al 2017 jyly bul kórsetkish 9%, 2016 jyly - 2,6% bolatyn. 
Búgingi tańda respýblıka boıynsha 204 qala men aýdandardan ártúrli kezeńderde bólek jınaý 51, al suryptaý 30 eldi mekende engizilgen. Sonymen qatar, qaldyqtardy bólek jınaý jáne suryptaý iri qalalar men qosa óńirlerde de júzege asyrylýda. Suryptaý keshenderinde myńnan astam jumys orny ashyldy. Sonymen qatar, qatty qaldyqtardy óńdeý salasyn odan ári damytý úshin qolaıly ınvestıtsııalyq ahýal, memlekettik qoldaý sharalary, memlekettik jáne jergilikti bıýdjetterden qarajat bólý, sondaı-aq jeke ınvestıtsııalardy tartý qajet. Osyǵan baılanysty qatty turmystyq qaldyqtardy basqarý salasyndaǵy problemalardy jan-jaqty sheshý jáne osy salada biryńǵaı kózqaras qalyptastyrý úshin Ekologııa, geologııa jáne tabıǵı resýrstar mınıstrligi múddeli memlekettik organdarmen jáne uıymdarmen birlesip qatty turmystyq qaldyqtardy basqarý salasyndaǵy memlekettik baǵdarlamany ázirleý boıynsha jumys júrgizip jatyr. 
Qatty turmystyq qaldyqtardy jeke jınaýdy tabysty júzege asyrýda halyqtyń ekologııalyq sanasy men mádenıeti mańyzdy ról atqarady. Sondyqtan, ekologııalyq bilimdi arttyrý maqsatynda respýblıkalyq jáne jergilikti deńgeıdi aýqymdy aqparattyq jumys júrgizilýde.
