Qatty kúıip qalǵan tarazdyq balanyń beti beri qarady
TARAZ. QazAqparat - Órtengen benzınge kúıip qalǵan 6 jasar Maksım Legostaevtyń emdik sharalary oıdaǵydaı júrip jatyr, dep habarlaıdy QazAqparat.
№2 qalalyq aýrýhananyń bas dárigeri Sáýle Mamashevanyń sózine sensek, Maksım Legostaev 12 kúnnen beri «Bas, moıyn, arqa jáne eki qolyn jalyn sharpyp, termııalyq kúıik shalý, ekinshi-úshinshi dárejeli kúıik» dıagnozymen aýrýhanada statsıonarlyq em qabyldap jatyr.
«Patsıent dıagnostıkanyń klınıkalyq hattamasyna sáıkes jáne tegin medıtsınalyq kómek aıasyndaǵy emdik-dıagnostıkalyq sharalar keshenin tolyq kólemde alyp jatyr. Qazir balanyń jaǵdaıy turaqty, kúıik aýmaǵy denesiniń 18%-ynan 12%-ǵa deıin azaıdy», - deıdi bas dáriger.
Búldirshinniń anasy Vera Legostaeva ulymen birge aýrýhanada jatyr. Ol balaǵa kútim jasaýdy óz qolyna alǵan.
«Dárigerler balamdy emdeý úshin qoldan kelgenniń bárin jasaýda. Emdeý protsesine kóńilim tolady. Aýrýhanaǵa kelip túskennen beri Maksımnyń jaǵdaıy jaqsardy. Maksım belsendi, tábeti jaqsy. Palatada óz betinshe júrip-turýǵa talpynyp júr. Dárigerler men búkil medıtsınalyq qyzmetkerlerge qamqorlyǵy úshin alǵys aıtamyn», - deıdi Vera Legostaeva.
Aıta ketý kerek, Maksım Legostaevtyń ata-anasy Tarazdaǵy emdik sharalarǵa kóńili tolatynyn aıtyp, balany Astanadaǵy ortalyq klınıkaǵa aýystyrýǵa qarsy bolǵan edi.
Eske sala keteıik, 17 maýsym kúni Tarazdyń №2 qalalyq aýrýhanasyna denesin kúıik shalǵan 6 jasar bala kelip túsken bolatyn. Dárigerler balaǵa I jáne III dárejeli kúıik (denesiniń 18%) dep dıagnoz qoıǵan. Jábirlenýshiniń sózine sensek, ol kórshiniń 7 jasar balalarymen birge tez tutanatyn suıyqtyqpen oınap júrip, belgisiz jaǵdaıda kúıip qalǵan.
Atalǵan derek boıynsha QR Qylmystyq kodeksiniń «Densaýlyqqa qasaqana ortasha aýyr zııan keltirý» baby boıynsha qylmystyq is qozǵaldy.
