Qatty boran men jel elimizdiń birqatar óńirindegi respýblıkalyq joldardy jabýǵa sebep boldy - «Qazaqavtojol» RMK
ASTANA. 19 naýryz. QazAqparat - Qatty boran men jelge baılanysty Qazaqstannyń birqatar oblystaryndaǵy respýblıkalyq mańyzy bar joldar jabyldy. Bul týraly búgin «Qazaqavtojol» RMK baspasóz qyzmeti habarlady.
Atap aıtqanda, qazirgi kezde Astanadan shyǵatyn baǵyttarda jáne Aqmola oblysy aýmaǵyndaǵy joldarda kólik qozǵalysyna tyıym salynyp otyr.
Sonymen qatar, Qaraǵandy oblysy óńirindegi «Ekaterınbor-Almaty» jolynyń Qaraǵandy oblysy men Aqmola oblysy aralyǵynda jáne «Qyzylorda-Pavlodar» avtojolynyń Qaraǵandy qalasy men Pavlodar oblysy ýchaskesinde joldar jabyldy.
Budan bólek, boran saldarynan Pavlodar aýmaǵyndaǵy «Qyzylorda-Pavlodar» jolynyń Ekibastuz-Qaraǵandy oblysy aralyǵy, «Ýlıanov-Kerneı-Baıanaýyl-Maıqaıyń- Qalqaman» jolynyń Baıanaýyl-Qaraǵandy oblysy shekarasy, sondaı-aq «Astana-Ereımentaý-Shiderti» jolynyń Shiderti-Aqmola oblysy aralyǵynda barlyq kólikterdiń qozǵalysyna shekteý engizildi.
Munymen qosa, Soltústik Qazaqstan óńirindegi «Ekaterınbor-Almaty» avtojolynyń Rýzaev-Aqmola oblysy shekarasy, «Jezqazǵan-Petropavl» jolynyń Novoıshım-Aqmola oblysy aralyǵy, «Kókshetaý-Rýzaev» avtojolynyń Elenovka-Aqmola oblysy ýchaskesinde jolaýshylar jáne jeńil kólikter úshin jolǵa shyǵýǵa tyıym salyndy.
