Qatty aıazǵa baılanysty ShQO aýmaǵyndaǵy respýblıkalyq joldarda kólik qozǵalysy shekteldi
ASTANA. 27 jeltoqsan. QazAqparat - Úsh oblystyń aýmaǵyndaǵy respýblıkalyq joldar jabyq. Bul týraly búgin «Qazaqavtojol» RMK-nyń baspasóz qyzmeti habarlady.
Almaty oblysy aýmaǵyndaǵy boranǵa baılanysty 21 jeltoqsan saǵat 09.40-tan bastap baılanysty "Úsharal-Dostyq" avtojolynyń 93-184 shaqyrymy aralyǵynda avtokóliktiń barlyq túrleri úshin jolǵa shyǵýǵa tyıym salyndy.
Al Ońtústik Qazaqstan oblysynda qalyń túsken qardyń saldarynan 26 jeltoqsan saǵat 20.00-den beri "Almaty-Tashkent-Termez" jolynyń 632-658 shaqyrymyndaǵy "Jaskeshý- Mashat ótkeli" aralyǵynda qoǵamdyq jáne júk avtokólikteriniń túrleri úshin shekteý qoıyldy.
Budan bólek, Shyǵys Qazaqstan oblysy aýmaǵyndaǵy aıazǵa baılanysty (aýa temperatýrasynyń tómendeýi -35-40 oS ) búgin saǵat 18.00-den bastap "Óskemen-Shemonaıha-RF shekarasy" avtojolynyń 15-123 shaqyrymyndaǵy "Glýbokoe aýyly-RF shekarasy" aralyǵynda qoǵamdyq jáne dızeldi avtokólikteriniń túrleri úshin jol jabyldy.
Sonymen qatar saǵat 18.00-den bastap "Óskemen-Rıdder-RF shekarasy" jolynyń 15-105 shaqyrymyndaǵy "Beloýsovka aýyly-Rıdder q" aralyǵynda da qoǵamdyq jáne dızeldi avtokólikteriniń túrleri úshin jolǵa shyǵýǵa shekteý qoıyldy.
Al saǵat 19.00-den bastap qolaısyz aýa raıyna baılanysty "Óskemen-Zyrıan-Rahman qaınary" jolynyń 6-164 shaqyrymyndaǵy "Ýshanova aýyly-Zyrıan q" aralyǵynda qoǵamdyq jáne dızeldi avtokólikteriniń túrleri úshin jol jabyldy.
