Qatty aıaz: ShQO-da ekinshi aýysym oqýshylary mektepke barmaıdy

ÓSKEMEN. QazAqparat – Shyǵys Qazaqstan oblysynyń birqatar aýdanynda ekinshi aýysymdaǵy oqýshylarǵa mektepte sabaq bolmaıdy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, 25 qańtarda aýa temperatýrasynyń tómendeýine baılanysty (-26) Óskemen qalasynda ekinshi aýysymdaǵy 1-4 synyp oqýshylaryna sabaq ótkizilmeıdi.

«Sondaı-aq Jarma aýdanynda synap baǵanasy -32 gradýsty kórsetkendikten 1-11 synyp oqýshylary úshin sabaq oqymaıdy. Al Rıdder qalasynda aýa temperatýrasy 30 gradýsqa deıin tómendep, 0-11 synyp oqýshylary men kolledjderdiń 1-2 kýrs stýdentteri sabaqtan bosatyldy» dep habarlady vedomstvo ókilderi.

Oqýshylar men stýdentter búgin úıden onlaın oqıdy.

Esterińizge sala ketsek, búgin Shyǵys Qazaqstannyń birqatar aýdanynda birinshi aýysymdaǵy mektep oqýshylary úshin sabaq bolmaıtyny habarlanǵan.