Qatty jelge baılanysty Pavlodar oblysynyń barlyq aımaǵynda sabaqtar onlaınǵa kóshirildi

ASTANA. KAZINFORM - Pavlodar oblysynda qatty jeldiń saldarynan mektepterdegi sabaqtar toqtatylyp, onlaınǵa aýystyryldy. 1-11 synyp oqýshylary jáne kolledjerdiń 1-2 kýrs stýdentteri qashyqtan oqyp jatyr.

Búgin Pavlodar qalasynyń mektepterinde birinshi aýysymdaǵy mektepaldy, 1-11 synyp oqýshylarynyń, kolledjderde 1-2 kýrs (9-synyptan keıin túsken) stýdentterdiń sabaqtary qashyqtan oqytý formatyna aýystyrylady. Qaladaǵy temperatýra - 1 gradýs, jeldiń kúshi sekýndyna 14-25 metr.

Óńirlik bilim berý basqarmasynan habarlaǵandaı, sabaqtardyń qashyqtan oqýǵa kóshirilýi barlyq aımaqtarda baıqalǵan.

- «Qazgıdromet» mekemesiniń bekitken parametrlerine sáıkes, aýdan-qalalar ózderindegi sabaqtardy onlaınǵa kóshirdi. Keıbir aýmaqta ol jeldiń jyldamdyǵy men aýa temperatýrasyna baılanysty bastaýysh synyptarǵa ǵana qoldanyldy. Qazirgi ýaqytta óńirdegi barlyq oqýshylardyń onlaın negizde bilim alýyna jaǵdaı qarastyrylǵan. Qajettilikterine oraı keıbir balalar kompıýterlik tehnıkamen qamtylǵan,-dep málimdedi basqarmadan.

Eske sala keteıik, Astanada 7 synypqa deıingi oqýshylar sabaqty qashyqtan oqıdy.