Qatty jeldiń saldarynan Kaspıı jaǵalaýyndaǵy qamys órtiniń aýmaǵy ulǵaıdy
ATYRAÝ. KAZINFORM — Kaspıı teńiziniń jaǵalaýyndaǵy qamys órti 450 gektar aýmaqty sharpyǵan. Órt áli sóndirilgen joq.
Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar toby qattyń jeldiń saldarynan jalyn sharpyǵan aýmaq ulǵaıǵanyn habarlady.
— Kaspıı teńiziniń jaǵalaýyndaǵy qamys órtiniń 4 oshaǵy keshe, 1 mamyrda saǵat 18:30 shamasynda anyqtaldy. Órt Atyraý qalasyna taıaý ornalasqan Tasqala aýylynan shamamen 40 shaqyrym qashyqtyqta tutanǵan. Teńiz jaǵalaýyndaǵy jalyndy sóndirýge tótenshe jaǵdaılar departamentiniń jeke quramy men quraldary jedel jumyldyryldy, - dep habarlady departamenttiń ımıdjdik jumys jáne syrtqy kommýnıkatsııalar toby.
Búgin órtti sóndirýge 101 adam, 21 tehnıka jiberilgen. Onyń ishinde tótenshe jaǵdaılar departamentinen 76 qyzmetker, 12 tehnıka, «Aqjaıyq» memlekettik tabıǵı rezervatynan 25 adam, 9 tehnıka bar.
Órtti sóndirý kezinde qıyndyq týyndap tur. Birinshiden, qamystyń bıiktigi — 2-2,5 metr, ári qalyń ósken. Ekinshiden, jalyn sharpyǵan aýmaqta batpaq bar.
— Qatty jeldiń ekpini saldarynan órttiń taralý aýmaǵy ulǵaıdy. Soǵan qaramastan tótenshe jaǵdaılar departamenti men «Aqjaıyq» memlekettik tabıǵı rezervatynyń qyzmetkerleri keshki saǵat 18:30–ǵa deıin 50 gektarǵa jýyq aýmaqtaǵy órtti sóndirdi. Al shamamen 400 gektar aýmaqtaǵy jalyn ózdiginen óshti. Órttiń jalpy aýmaǵy anyqtalyp jatyr. Sóndirý jumysy jalǵasa beredi. Eldi mekenderge taralý qaýpi joq, - dep málim etti departamenttiń ımıdjdik jumys jáne syrtqy kommýnıkatsııalar tobynan.
Eske sala ketelik, buǵan deıin Atyraý oblysynda taǵy da qamys órtenip jatqanyn habarladyq.