Qatty jelden soń jaryqsyz qaldy: Qyzylordada jaǵdaı qalypqa keldi
QYZYLORDA. KAZINFORM — Qolaısyz aýa raıynyń kesirinen birneshe saǵat boıy jaryqsyz qalǵan Qyzylorda qalasynyń birneshe aýmaǵynda jaǵdaı retteldi. Bul týraly Qyzylorda elektr taratý toraptary kompanııasynan málimdedi.
Eske salsaq, 28 maýsym kúni qatty jeldiń saldarynan turǵyn úıler men mekemelerdiń shatyry ushyp, ol elektr jelilerine tıip, symdar úzilip, elektr baǵanalary búlingen bolatyn. Sonymen qatar qulaǵan taldar men kóshe jaryǵynyń tirekteri, shamdary da zııanyn tıgizdi.
Osyǵan baılanysty birqatar aýmaqta elektr energııasyn berý ýaqytsha toqtatyldy.
— Apattyń saldaryn joıý maqsatynda kúsheıtilgen rejımde avarııalyq-qalpyna keltirý jumysy júrgizildi. Oǵan 10 jedel brıgada, 10 arnaıy tehnıka, 5 aýyr tehnıka jáne 55 qyzmetker jumyldyryldy. Mamandar turǵyn úıler men mekemelerdiń shatyrynan elektr jelilerine túsken bógetterdi alyp tastap, qulaǵan taldar men kóshe jaryǵy tirekterinen kelgen zaqymdy joıdy. Synǵan elektr baǵanalary men úzilgen symdardy qalpyna keltirdi. Qazirgi tańda jumys tolyq aıaqtalyp, elektr energııasy barlyq tutynýshylarǵa tolyq kólemde qaıta berildi, — delingen habarlamada.
Tosynnan bolǵan bul jaǵdaıdy qala ákimdigi qatań baqylaýynda ustady.
