Qatty jelden keıin Pavlodardyń úsh birdeı yqsham aýdany jaryqsyz qaldy

Búgin tańerteńgilik ýaqytta Pavlodarda qatty jel Lomov kóshesindegi qýat kabeline zaqym keltirgen. Saldarynan birneshe yqsham aýdan elektr jaryǵynan ýaqytsha ajyratyldy, dep habarlaıdy Kazinform.

«Aýa raıynyń qolaısyzdyǵyna baılanysty elektr energııasy Ýsolka, Zelenstroı, Dachnyı yqsham aýdandarynda óshirildi. Atalmysh máseleni sheshý boıynsha jumystar júrgizilip jatyr. Jaryqpen tolyq qamtamasyz etý shamamen 1-2 saǵatta qalpyna keltiriledi», - dep habarlady Pavlodar qalalyq ákimdiginen.

«Pavlodarenergo» AQ-nyń baspasóz qyzmetiniń habarlaýynsha, qatty jel Lomov kóshesindegi qýat kabelin zaqymdaǵan. Avarııalyq qyzmetter qala kóshelerindegi elektr júıelerinde qaıta qosý jumystaryn júrgizdi. Qazirgi ýaqytta úılerge jaryq qosyla bastady. 

Sınoptıkter búgin Pavlodar oblysy aýmaǵyndaǵy jeldiń jyldymdaǵy sekýndyna 30 metrge deıin jetetinin eskertken. Aýmaqta kóz ashtyrmaıtyn boran soǵyp tur.