Qatty jelden elordaǵa qandaı zalal kelip jatyr

ASTANA. KAZINFORM – Astana qalasynyń Tótenshe jaǵdaılar departamenti aýa raıyna baılanysty (jeldiń ekpini 26 m/s deıin) tabıǵı sıpattaǵy bir tótenshe jaǵdaı tirkelgenin habarlaıdy.

Qatty jelden elordanyń birneshe aýdany jaryqsyz qaldy. 

«TJD josparlaý jáne jedel basqarý ortalyǵyna bolǵan oqıǵalar boıynsha 19 habarlama kelip tústi. Onyń ishinde: munara kranynyń qulaýy-1, shatyr konstrýktsııalarynyń qıraýy – 8, ákimshilik ǵımarattardyń shatyrynyń qıraýy - 2, balkon konstrýktsııasynyń buzylýy-1, ǵımarattar men aǵashtardyń qaptamasynyń fragmentterimen avtomobılderdiń zaqymdanýy - 6, basqa da zaqymdar – 1», - delingen habarlamada.

Aqparatta aıtylǵandaı, tótenshe jaǵdaı ınspektorlary qatty jelden qıraǵan oryndarǵa baryp, belgilep jatyr.

«6-7 qarashada Astana qalasynda qatty jel, kóktaıǵaq, boran kútiletini týraly daýyldy eskertý jarııalandy. Ońtústik-batys jel 15-20 m/s, ekpini 23-28, keıde 30 m/s jáne odan da qatty bolýy yqtımal. 6 qarashada saǵat 21-00-den bastap aýa raıynyń qolaısyzdyǵyna baılanysty (qatty qar, boran, kórinýdiń shektelýinen) «Astana – Petropavl», saǵat 23-00 «Ekaterınbýrg-Almaty» jáne 7 qarashada 01-03 «Astana - Pavlodar oblysynyń shekarasy respýblıkalyq mańyzy bar avtojoldar barlyq qozǵalys jabyldy», - degen málimet aldyq TJD-dan.

Búgin tańǵy saǵat 8-30-dan bastap aýa raıy turaqtalyp, Astana qalasynan respýblıkalyq mańyzy bar barlyq avtojol boıynsha qozǵalys qaıta ashyldy.

Osyǵan oraı Astana qalasy TJD burshaq pen qatty jel kezinde jaraqat pen jaraqat almaý úshin qatty jel kezinde azamattar qaýipsizdik sharalaryn saqtaýdy usynady:

- ǵımarattardan shyǵýǵa asyqpańyz (múmkindiginshe úı-jaılarda bolyńyz);

- balalardy erekshe baqylaýǵa alyńyz jáne olardy qaraýsyz qaldyrmaý mańyzdy;

- eger qatty jel kezinde syrtta bolsańyz, jaqyn mańdaǵy kireberiste nemese dúkende panalańyz;

- úılerdiń qabyrǵalaryna jaqyn jerde qatty jelden jasyrynbańyz, óıtkeni shatyrlardan shatyr materıaldary qulap ketýi múmkin;

- qoǵamdyq kóliktiń ashyq aıaldamalarynda, bılbordtardyń astynda, aǵashtarda, aıaqtalmaǵan ǵımarattarda jasyrýǵa bolmaıdy;

- qatty jel kezinde elektr jelisiniń astynda turyp, úzilgen elektr symdaryna jaqyndaý óte qaýipti;

- jeke avtokólikti aǵashtardan qaýipsiz qashyqtyqta qoıý usynylady.

Tótenshe jaǵdaılar kezinde «101» jáne «112» nómirine habarlasý kerek.

Aıta ketsek, kesheden beri elordada qatty jel soǵyp, qolaısyz aýa raıy qala turǵyndaryn ábigerge salyp jatyr.