Qatty jel soǵady: Qazgıdromet atyraýlyqtarǵa eskertý jasady

ATYRAÝ. KAZINFORM – Atyraýda sońǵy bir aptadan beri kún raıy buzyldy. Birneshe kún jańbyr jaýyp, munaıly shahar kóshelerin sý basty. Al, búgin alǵashqy qar jaýdy.

Búgin, 6 qarashada Atyraýda ekpindi jel soǵyp tur. Salqyndyq baıqalady. Atyraý oblystyq tótenshe jaǵdaılar departamenti keshe, 5 qarashada óńir turǵyndary men qonaqtaryna aýa raıynyń qubylýyna baılanysty eskertý bergen edi. 

«Atyraý oblysynyń aýmaǵynda «Qazgıdromet» RMK-nyń boljamyna sáıkes 6 qarasha kúni qatty jel soǵady. Jel ekpini sekýndyna 18-23 metrge jetedi. Osyǵan baılanysty oblys turǵyndary men qonaqtaryna múmkindiginshe úıden shyqpaýdy, balalardy erekshe baqylaýǵa alyp, olardy qaraýsyz qaldyrmaýdy, qoǵamdyq kólik aıaldamalarynda abaı bolýdy, jarnama qalqandary men qurylysy aıaqtalmaǵan nysandardan alshaq júrýdi eskertemiz», -dep habarlady departamenttiń qoǵammen baılanys toby. 

Sondaı-aq, 112 arnasynan munaıly óńirdiń keı bóliginde burqasyn bolýy múmkin ekeni jóninde habarlama tarady. 

Eske sala ketelik, buǵan deıin Atyraý kóshelerin sý basqanyn habarlaǵan bolatynbyz.