Qatty soqqan jeldiń saldarynan 20-dan astam aýyl jaryqsyz otyr - Ashat Shaharov

AQTÓBE. KAZINFORM - Aqtóbede 20-dan astam aýylda jaryq joq. Bul týraly Aqtóbe oblysynyń ákimi Ashat Shaharov áleýmettik jelidegi paraqshasynda habarlady.

Aqtóbe oblysynda boran saldarynan elektr symdary zaqymdanyp jatyr.

Oblys ákimi 20-dan astam aýylda jaryq joq ekenin habarlap, jumys toqtaýsyz júrip jatqanyn aıtty.

— Kúshti boran, aýa raıynyń qolaısyzdyǵy turǵyndardy áýre-sarsańǵa salýda. Qazirgi ýaqytta oblysymyzda qatty soqqan jeldiń saldarynan 20-dan astam aýyl jaryqsyz otyr. Kún demeı, tún demeı, mamandardy jumyldyra otyryp, bul apattyq jaǵdaıǵa baılanysty qalpyna keltirý jumystaryn kúsheıtilgen rejimde júrgizip jatyrmyz. Qala boıynsha 15 brıgada jaryq sóngen jerlerge jumyldyryldy. Qajetti tehnıkalar men kólikter bar. Oblys boıynsha elektr qýatynsyz qalǵan aýdandardaǵy keıbir aýyldarda da jumystar jasalýda. 20 avarııalyq brıgada men 70-ke jýyq tehnıka tartyldy. Keı eldi mekenderde qýat kózi qalypqa keltirildi. Tabıǵattyń tosyn minezinen elektr jaryǵynyń sónýine qatysty apattyq jaǵdaı jeke baqylaýymda. Elektr qýatyn qalypqa keltirip, turǵyndardy tez arada jaryqpen qamtý boıynsha jaýapty mekemelerge naqty tapsyrma berildi. Tıisti basqarmalar men mekemeler qosymsha aqparattan habardar etip otyrady, — dep jazdy Aqtóbe oblysynyń ákimi Ashat Shaharov. 

Eske salsaq, Aqtóbede boran saldarynan mektep oqýshylary qashyqtan oqydy.

Reıster keıinge shegerildi.