Qatty nóserden keıin Rımdi sý basty
ASTANA. KAZINFORM - Birneshe aptaǵa sozylǵan anomaldy ystyqtan keıin Rımde qatty nóser jaýdy. Italııa astanasynyń jekelegen aýdandarynda birneshe saǵat ishinde qyrkúıek aıyndaǵy ortasha aılyq mólsherden de kóp jaýyn-shashyn tústi, dep habarlaıdy Kazinform agenttiginiń menshikti tilshisi.
Roma Today basylymynyń málimetinshe, qalanyń shyǵysy men ońtústik-shyǵysyndaǵy Tor-Vergata, Kazılıno jáne Salone aýdandarynda 2-3 saǵat ishinde 85-ten 118 mm-ge deıin jaýyn-shashyn túsken. Tor-Vergatada nebári eki saǵatta shamamen 100 mm jańbyr jaýǵan.
Taǵy bir qatty jaýyn-shashyn oshaǵy EUR aýdanynda tirkeldi. Onda bir saǵatta 85 mm-ge deıin jaýyn-shashyn túsken. Kórshiles Ostıense, San-Djovannı jáne Tor-Marancha aýdandarynda 50-70 mm jaýyn-shashyn tirkeldi. Bul aılyq ortasha mólsherge jýyq.
Rım kóshelerin sý basty. Sý jertólelerge, garajdarǵa jáne jerasty ótkelderine kirgen.
Aýa raıynyń qolaısyzdyǵyna baılanysty bılik metronyń birneshe stantsııasyn jabýǵa májbúr boldy. Órt sóndirýshiler men polıtsııa qyzmetkerleri 350-ge jýyq shaqyrtýǵa shyqty. Qutqarýshylar sý basqan kólikterden júrgizýshilerdi shyǵarýǵa kómektesti, qulaǵan aǵashtar men butaqtardy jınady, sondaı-aq sýdy soryp shyǵardy.
Rımniń ózinde qaza tapqandar tirkelgen joq. Italııanyń basqa óńirlerinde osy kúnderi qolaısyz aýa raıynan eki adam qaza tapty. Qaıǵyly jaǵdaılardyń biri Frıýlı-Venetsııa-Djýlııa óńirinde, ekinshisi Toskanada boldy.
12 qyrkúıekke qaraı Rımdegi aýa raıy turaqtandy. Qalada kún ashylyp, aýa temperatýrasy shamamen +30 °C boldy. Qalalyq qyzmetter nóserdiń saldaryn joıý jumystaryn jalǵastyryp jatyr.
Jergilikti buqaralyq aqparat quraldary sońǵy jyldary Rımde qysqa ýaqytqa sozylǵanymen, óte qatty nóserlerdiń jıilegenin atap ótedi. Mundaı jaǵdaılar ásirese uzaq ýaqytqa sozylǵan qurǵaq kezeńderden keıin jıi baıqalady.
Aıta keteıik, buǵan deıin Italııada 2026 jyldyń jazy 1950 jyldan bergi búkil baqylaý kezeńindegi eń ystyq jaz bolǵany týraly jazǵan edik.
