Qatty nóser kentaýlyqtardy ábigerge saldy
TÚRKІSTAN. KAZINFORM — Qatty nóserdiń saldarynan Kentaýdyń kóshelerin sý basty.
Qaladaǵy ortalyq kóshelerde jınalǵan jańbyr sýy turǵyndardyń júrip-turýyna qıyndyq týdyrdy. Kólik joldary men bazar ishi de sýǵa tolyp ketti. Saldarynan kásip ıeleriniń birshama zaty búlindi. Al, avtobeket pen bazar ishinde adamdar tobyqtan asatyn sýdy keship júrýge májbúr boldy.
Áleýmettik jelide taraǵan vıdeodan turǵyn úılerdiń aýlalaryna da sý kirgenin kórýge bolady. Tipti, bir úıdiń aýlasy men qosymsha qurylys nysanynyń ishine kirgen sý, ekinshi jaǵynan tesip shyǵyp jatqanyn turǵyndar vıdeoǵa túsirip alǵan.
Al, keshkisin Kentaý qalasynyń ákimdigi jaǵdaıdyń turaqtalǵandyǵyn jetkizdi.
«15 sáýir kúni 16:00-den 17:10-ǵa deıin bolǵan jaýyn-shashynnyń saldarynan Kentaý qalasyndaǵy 3 jeke turǵyn úı aýlasy men 1 úıdiń jertólesin, 1 úıdi tolyqtaı jáne «Salıha ana» bazaryndaǵy 26 kásipkerlik nysanyn sý basty. TJD kúshteri men jergilikti ákimdik qyzmetkerleri tarapynan sýdy tartý jáne arnasyn burý jumystary júrgizildi. Jaǵdaı turaqty», - delingen Kentaý qalasy ákimdigi taratqan aqparatta.
