Qatty aıazǵa baılanysty Petropavl JEO-2 kúsheıtilgen rejımde jumys istep tur
PETROPAVL. KAZINFORM – Soltústik Qazaqstan oblysynyń energojúıesi aıazdyń kúsheıýine baılanysty eki aptadan beri kúsheıtilgen jumys rejıminde jumys istep jatyr.
«SEVKAZENERGO» AQ baspasóz qyzmetiniń málimetinshe, Petropavl JEO-2, Soltústik Qazaqstan elektrjelistik taratý kompanııasy jáne Petropavl jylý jelileriniń jaýapty qyzmetkerleri táýlik boıy kezekshilik atqarady. Apatty jaǵdaılarǵa jol bermeý úshin jabdyqtardy aralaý jáne asa mańyzdy toraptardy tekserý sany artqan.
- Tutynýshylar belgilengen jylýtasymaldaǵysh parametrlerine saı jylýmen qamtamasyz etilip jatyr. Otyn qory máselesi erekshe nazarda. 26 qańtardaǵy jaǵdaı boıynsha 200 myń tonnaǵa jýyq kómir qory bar. Bul negizgi otynnyń normatıvtik qorynan shamamen 64 myń tonnaǵa artyq. Al mazýt qory – 1 900 tonna, belgilengen norma 300 tonna, - dedi «SEVKAZENERGO» AQ bas dırektory Anatolıı Kazanovskıı.
Sondaı-aq jedel áreket etý úshin Soltústik Qazaqstan elektrjelistik taratý kompanııasy jáne Petropavl jylý jelilerinde apattyq-qalpyna keltirý brıgadalary kúsheıtildi. Arnaıy tehnıka táýlik boıy kezekshilikke qoıylyp, jyly bokstarǵa ornalastyryldy. Bul tehnologııalyq aqaýlar týǵan jaǵdaıda habarlamalar boıynsha jyldam áreket etýge jáne elektr men jylý jetkizýdegi yqtımal úzilisterdiń aldyn alýǵa múmkindik beredi.
SQO ákimi Ǵaýez Nurmuhambetov jylý-elektr ortalyǵynda bolyp, jaǵdaıdy kórdi.
- Qazirgi ýaqytta stantsııada 10 qazandyq pen 7 týrboagregat jumys istep tur. Qalada jylytý maýsymy 3 tútin murjasymen bastaldy. Jumys shtattyq rejımde júrip jatyr. Jylýmen qamtamasyz etý kórsetkishteri belgilengen talaptarǵa saı. 2025 jyly oblys kóleminde 12,6 shaqyrym jylý jelisi, 1 520 shaqyrym elektrmen jabdyqtaý jelisi qaıta jańǵyrtylyp, 227 qosalqy stantsııasyna rekonstrýktsııa júrgizildi. Bunyń barlyǵy jylytý maýsymynyń turaqty ótýin qamtamasyz etýge múmkindik berip otyr, - dedi Ǵaýez Nurmuhambetov.
Búginde SQO boıynsha 484 qazandyq jumys isteıdi. Qystan qysylmaı ótý úshin 562 myń tonna kómir qory daıyndalǵan.
Buǵan deıin Óskemende elektr jelilerindegi apat saldary joıylyp, úılerge jylý berilgenin jazǵan edik.