Qatty aıaz saldarynan Qaraǵandynyń 7 jol ýchaskesinde kólik qozǵalysy shekteledi

QARAǴANDY. KAZINFORM — Qaraǵandy oblysynda joldyń jeti ýchaskesinde dızeldik otynmen júretin jáne qoǵamdyq kólikterdiń qozǵalysy shektelmek.

Oblys aýmaǵynda aýa temperatýrasy -38 deıin tómendeıdi.

«QazAvtoJol» UK» AQ derekterine sáıkes 23 qańtar 18:30–dan bastap aýa raıynyń nasharlaýyna baılanysty respýblıkalyq mańyzy bar avtojoldardyń 7 ýchaskesinde dızeldi jáne qoǵamdyq avtokólik quraldarynyń qozǵalysyna shekteý engiziledi:

— «Ekaterınbýrg — Almaty» (1505 — 1854 km, Atameken aýyly — Balqash qalasy);
— «Qaraǵandy — Aıagóz — Buǵaz» (17 — 217 km, Qaraǵandy qalasy — Qarqaraly qalasy);
— «Qalqaman — Baıanaýyl — Úmitker — Kerneı — Botaqara» (231 — 324 km, Pavlodar oblysynyń shekarasy — Botaqara kenti);
— «Qyzylorda — Pavlodar» (970 — 1135 km, Qaraǵandy qalasy — Pavlodar oblysynyń shekarasy);
— «Ekaterınbýrg — Almaty» (1353 — 1426 km, Aqmola oblysynyń shekarasy — Temirtaý qalasynyń jolaqysyn tóleý beketi);
— «Qyzylorda — Pavlodar» (788 — 906 km, Oblys Ulytaý shekarasy — Topar kenti);
— «Astana — Qabanbaı batyr — Nura — Temirtaý» (51-266 km, Aqmola oblysynyń shekarasy — Temirtaý qalasy).

Eske salaıyq, 21 qańtardan bastap óńirde joldardyń birneshe ýchaskesi jabyldy. Temirtaý mańyndaǵy jol aqysyn tóleý pýnktinde myńnan asa avtokólik keptelip qalǵan bolatyn. 

Bul avtokólikterdiń jolaýshylary jylytý beketterine evakýatsııalandy. 

Sonymen qatar, keshe Temirtaýdan Astanaǵa qaraı qozǵalys qaıta jandandy. 

Búgin Qaraǵandy-Balqash tas jolynda jıyrmaǵa jýyq kólik soqtyǵysyp qaldy.